Përfundoi muaji i majit, kushtuar Zojës së Bekuar: në Kopshtet e Vatikanit, me procesionin
tradicional.
(31.05.2010 RV)Sonte, duke nisur nga ora 8.00, qindra besimtarë po përshkojnë
përsëri rrugëzat e Kopshteve të Vatikanit, duke thënë Rruzaren Shenjte, në përfundim
të muajit marian. Në sa mbi Kopshtet ka rënë dalë-nga-dalë muzgu, besimtarët po i
shprehin, përmes lutjes, mirënjohjen Zotit Krijues. Çdo vit, më 31 maj, qindra
flakëza ndriçojnë rrugicat e bleruara të Vatikanit. Janë qirinjtë e besimtarëve, që
luten e u këndon vetë zemra, në sa ecin nga Kisha e Shën Shtjefnit të Abisinëve, për
të arritur tek Shpella e Lurdës, ku është në kremtim e sipër Liturgjia e Fjalës
së Zotit, kryesuar nga kardinali Anxhelo Komastri, Kryeprift i Bazilikës së Shën Pjetrit
e Mëkëmbës i përgjithshëm i Shenjtërisë së tij për Qytetin e Vatikanit. Në përfundim
të kremtimit, besimtarëve do t’u flasë edhe Benedikti XVI. Pranë kësaj Shpelle
simbolike tashmë mund të kundrohet edhe mozaiku i Zojës së Këshillit të Mirë, Pajtore
e shqiptarëve. E duke thënë Rruzaren, besimtarët kujtojnë lindjen e Jezusit dhe
fëmijërinë e tij të parë, të udhëhequr në mënyrë pothuajse të dukshme nga Shpirti
Shenjt. E Zemra e Zojës, në përkim të plotë me atë të Birit hyjnor, është tempull
i Shpirtit të së vërtetës, ku çdo fjalë e çdo ngjarje ruhet me fe, me shpresë e me
dashuri. Prej këndej, dëshira për t’i përngjarë Nënës së Jezusit, sepse në shkollën
e Marisë edhe ne mësojmë ta njohim praninë e Shpirti Shenjt në jetën tonë, ta ndjejmë
frymëzimin që vjen prej tij e ta ndjekim përvujtërisht. Ai na bën të rritemi, sipas
natyrës së Krishtit, e na dhuron frytet e mira, që Shën Pali Apostull i numëron në
Letrën drejtuar Galatëve: “Dashurinë, gëzimin, paqen, shpirtmadhësinë, dashamirësinë,
butësinë, besnikërinë, përvujtërinë, vetsundimin” (Gal 5,22). Kujtojmë
se dita e fundit e muajit të Zojës kremtohet në qindra kisha e kapela, kushtuar Nënës
së Krishtit në të katër anët e botës, edhe në Shqipëri e në Kosovë, posaçërisht në
shenjtëroret kombëtare të Zojës së Këshillit të Mirë rrëzë Kështjellës Rozafa e në
shenjtëroren e mirënjohur të Zojës në Letnicë.