Akoma pa zgjidhje kriza politike në Shqipëri

(26.05.2010 RV)Strasburgu nuk i bind politikanët shqiptarë të ulen në tryezën e bisedimeve. Zyrtarët e lartë evropianë i kanë lënë një afat dyjavor Partisë Demokratike në pushtet dhe Partisë Socialiste në opozitë për të gjetur rrugëdaljen nga kriza politike, që e mban vendin të mbërthyer prej 10 muajsh. Kryeministri Sali Berisha sot hodhi poshtë pretendimet e socialistëve se Strasburgu, ku si ai ashtu edhe kryesocialisti Edi Rama u takuan me autoritetet e Bashkimit Evropian, caktoi ndonjë ultimatum për zgjidhjen e krizës.