Spitali"Bambino Gesù" - “Krishti Foshnje”. Një çerek shekulli veprimtari kërkimore
dhe mjekime.
Sot, më 25 maj, spitali pediatrik “Krishti Foshnje” kremton 25-vjetorin e njohjes
si institut i shtrimit dhe i kurimit me karakter shkencor. Një çerek shekulli gjatë
të cilit, ditë për ditë, aftësi dhe profesionalizëm ndërkombëtar janë derdhur së bashku
në veprimtarinë kërkimore në fushën biomjekësore. Një ndërthurje e vazhdueshme kjo
e diturive laboratorike dhe klinike për të përcaktuar diagnozat dhe terapitë më të
mira për pacientët e vegjël. “Një shembull i mjekësisë efikase”, nënvizoi ministri
italian i shëndetësisë Ferruço Facio, që mori fjalën gjatë festës së këtij institucioni.
“Ajo që është realizuar nuk është bërë rastësisht, por duke ndjekur një plan manaxherial
shumë të përpiktë. Kënaqësia më e madhe, është kur sheh se e gjithë kjo nuk është
diçka e rastësishme dhe nuk bëhet për para. Ofrohen shërbime mjekësore të mira me
një synim të përcaktuar qartë.” shtoi ministri Facio. Spitali pediatrik “Krishti
Foshnje” gjatë jetës së tij ka bërë kërkime të ndryshme duke filluar nga ato bazë
deri tek transplantimet, nga laboratori tek shtrati i pacientit nëpërmjet një metode
mjekimi të re, e cila vendos çdo fëmijë të sëmurë në qendër të vëmendjes së proceseve
të diagnozës dhe të terapisë, me ndihmën e menjëhershme të arritjeve më të fundit
në fushën kërkimore. Të një rëndësie të veçantë janë arritjet e fundit në fushën e
gjenetikës dhe të sëmundjeve të rralla, të imunologjisë dhe të onkoematologjisë deri
tek mjekësia që shfrytëzon zbatimin e modeleve matematike të llogarive të ndërlikuara,
e që lejon gjetjen në mënyrë shkencore të kushteve që përcaktojnë mundësinë e shfaqjes
së një sëmundjeje në të ardhmen, e madje edhe duke simuluar reagimin e organizmit
ndaj trajtimeve të ndryshme terapeutike.