Republika Çeke: përfundon mosmarrëveshja Kishë-Shtet për katedralen e Pragës.
(25.05.2010 RV)Presidenti çek, Vaclav Klaus dhe kryeipeshkvi i ri i Pragës,
imzot Dominik Duka nënshkruan dje në Pragë marrëveshjen që rregullon marrëdhëniet
dhe mirëmbajtjen e katedrales së Shën Vitos, monument historik në kompleksin e Kështjellës
së Pragës. Përfundon kështu, pas 18 vjet kundërshtish, konflikti ndërmjet Kishës
Katolike e shtetit për pronësinë e katedrales. Shteti e Kisha, siç shpjegoi presidenti
çek, do të kujdesen sëbashku për administrimin e vendit të rëndësishëm të kultit,
siç është bërë edhe në të kaluarën. Sipas marrëveshjes, Kisha do të merret me funksionimin
e katedrales ndërsa shteti do të mbetet pronar i saj e do ta mirëmbajë.