Benedikti XVI dhe muaji marian: Virgjëra na fton ta shohim Jezusin me sytë e fesë
(25.05.2010 RV)Muaji kushtuar Zojës
po i afrohet fundit. Por akoma mbeten ditë për të përjetuar, sëbashku me Virgjërën
Shenjte, afërsinë e Zotit. Sipas traditës, më 31 maj, Papa do t’i mbyllë kremtimet
e muajit marian, në Kopshtet e Vatikanit. Por le të kujtojmë disa nga meditimet e
Benediktit XVI mbi fenë e Shën Marisë, model për çdo të krishterë.
Në shkollën
e Zojës, mësojmë edhe ne ta njohim praninë e Shpirtit Shenjt në jetën tonë, pati thënë
Papa pikërisht në mbylljen e muajit të majit, në vitin 2008. Virgjëra, vazhdon Ati
i Shenjtë, sheh me sytë e fesë veprën e Zotit në histori, prandaj, Magnificat-i i
saj mbetet interpretimi më i vërtetë e më i thellë i historisë. Shën Maria sheh qartë
se fronet e të pushtetshmëve të kësaj bote janë të gjithë të përkohshëm, ndërsa froni
i Hyjit është i vetmi shkëmb, që nuk ndryshon e nuk bie. Benedikti XVI fton të krishterët
ta imitojnë Zojën: “Të mbajmë me vete të njëjtat ndjenja lavdërimi e falenderimi
që Maria i drejton Zotit, të njëjtën fe e shpresë, të njëjtin lëshim të butë në duart
e Provanisë Hyjnore. Ta imitojmë shembullin e saj të gatishmërisë dhe të bujarisë
në shërbim të vëllezërve. Me të vërtetë, vetëm duke e pranuar dashurinë e Zotit e
duke e kthyer jetën tonë në një shërbim bujar e pa interes ndaj të afërmit, do të
mund t’i thurim këngë lavdi Hyjit” (Mbyllja e muajit marian, 31 maj 2008). Papa
ndalet në natyrën e zemrës së Shën Marisë, “model bamirësie për Kishën”. Është vetë
Jezu Krishti, Ai që e shtyn Shën Marinë të shkojë me bujari drejt të afërmit në nevojë.
Ai e ndihmon të kapërcejë gjithçka: “Zemra e Marisë, në pajtim të përkryer
me Birin hyjnor, është tempull i Shpirtit të së vërtetës, ku çdo fjalë e çdo ngjarje
ruhet në fe, në shpresë e në dashuri” (Mbyllja e muajit marian, 31 maj 2009). Ne,
thotë Papa, mund t’i drejtohemi Shën Marisë me anë të lutjes. Në veçanti, me Rruzaren,
e cila na bën t’i përshkojmë etapat e jetës së Krishtit, në praninë e Zojës së Bekuar.
Benedikti XVI nuk mugon të verë në dukje lidhjen e veçantë ndërmjet Shën Marisë, Shpirtit
Shenjt e Kishës: “Në ditën e Rrëshajve, Virgjëra Nënë duket sërish si Nusja
e Shpirtit, si nënë universale për të gjithë ata që janë krijuar nga Zoti për fenë
në Krishtin. Ja përse Maria është për të gjitha brezat, imazh e model i Kishës, e
cila, sëbashku me Shpirtin Shenjt, ecën në kohë, duke pritur kthimin e lavdishëm të
Krishtit: “Eja, o Zot, Jezus” (Mbyllja e muajit marian, 31 maj 2009). Zoja,
na kujton Papa, është e para që e ka pranuar Krishtin e prandaj është e mbushur me
gëzim nga Shpirti Shenjt. Duke e ndjekur e duke e imituar, jemi të gjithë të thirrur
ta jetojmë këtë gjendje hiri: “Të pranojë Jezusin e t’ua çojë Atë të tjerëve
është gëzim i vërtetë për të krishterin! Të dashur vëllezër e motra, ta ndjekim e
ta imitojmë Marinë, këtë shpirt thellësisht eukaristik, e krejt jeta jonë do të bëhet
Magnificat” (Mbyllja e muajit marian, 31 maj 2005).