Երէկ՝ կիրակի, 23 մայիսին, Սրբուհի Ռիթայի տարեկան
ուխտի օրն էր։ Առ այդ Ռաուտայի ուխտատեղիին մէջ կիրակի յետմիջօրէի ժամը 5։00ին մատուցուեցաւ
Ս. պատարագ, որուն յաջորդեց աւանդական նշխարհամբոյրն ու վարդերու օրհնութիւնը։ Ս պատարագը
մատուցեց եւ հաւատացեալ ժողովուրդին իր պատգամը փոխանցեց հայ կաթողիկէ հայոց պատրիարք
Ներսէս Պետրոս ԺԹ Թարմունի։ Ան բացատրեց, որ Սրբուհի Ռիթա միշտ Աստուած սեպած է իր հայրը,
որմէ կրնայ ամէն ինչ խնդրել եւ ընդունիլ։ Ան աղօթասիրութիւնը սորված է իր ծնողքէն։ Պատրիարքը
նկատել տուաւ, որ մեղքը կը բաժնէ, իսկ սուրբ հոգին կը միացնէ՝ աւելցնելով, որ Ս հոգին
ներկայ էր Ս Ռիթայի տան մէջ, որովհետեւ ան միշտ կաշխատէր խաղաղութիւն հաստատել իր տան,
նաեւ գիւղի մէջ գտնուող հակառակորդ մարդոց միջեւ։ Պէտք է պայքարինք, որ Ս Գրիգոր Լուսաւորիչի
սերմանած հաւատքը չմարի մեր ընտանիքներուն, մեր երիտասարդներուն եւ մեր պատանիներուն
մօտ, շեշտեց Ներսէս Պետրոս ԺԹ պատրիարքը՝ աւելցնելով, որ եկեղեցւոյ առաջին պաշտօնն է
քարոզներով մեր ժողովուրդին հասնիլը։ Ան յայտնեց, որ Ս Ռիթա ամբողջ կեանքին մէջ կը փնտռէր
Աստուծոյ կամքը զայն կատարելու համար՝ նոյնիսկ եթէ այդ կամքը իր համոզումին հակառակ ըլլար։
Սրբուհի Ռիթա նշանաւոր է իբրեւ անկարելի դատերու սրբուհի կամ անյոյս դատերու փաստաբանը,
հաստատեց պատրիարքը՝ աւելցնելով, որ Աստուած հաստատած է բոլոր սուրբերը, որպէսզի մեզի
բարի օրինակ հանդիսանան։ Ներսէս Պետրոս ԺԹ պատրիարք նկատել տուաւ, որ այս տարի կը զուգադիպի
Ս Ռիթայի սրբացման 110-րդ տարեդարձին, որ տեղի ունեցած էր 24 մայիս, 1900-ին, ձեռամբ
Լեւոն ԺԳ սրբազան քահանայապետի։ Թող սրբուհի Ռիթայի սքանչելի կեանքը օրինակ դառնայ բոլորիս
իր աղօթասիրութեամբ, ներումով եւ խաղաղասիրութեամբ Թող սրբուհի Ռիթայի բարեխօսութիւնը
ձեր հաւատքին ուժը դառնայ, եզրափակեց Ներսէս Պետրոս ԺԹ։