Katolikët në politikë. Imzot Fizikela: koherentë në mesazh e në jetë
(24.05.2010 RV)Përfundoi të shtunën mbledhja e 24-t e përgjithshme e Këshillit
Papnor të Laikëve, mbledhur në Romë për të diskutuar mbi temën “Dëshmitarë të Krishtit
në bashkësinë politike”. Duke pritur në audiencë pjesëmarrësit, një ditë më parë,
Papa Benedikti XVI theksoi se sot më shumë se kurrë ndihet nevoja e të krishterëve
të vërtetë në politikë, për të mbrojtur vlera si jeta, familja, solidariteti me të
varfërit, liria, e mira e përbashkët. Pikërisht për përgjegjësinë e besimtarëve laikë
në politikë folëm me kryetarin e Akademisë Papnore për Jetën dhe kapelanin e Dhomës
italiane të Deputetëve, imzot Rino Fizikela: Përgjegjësia
e parë është vetëdija e qartë për momentin historik që po jetojmë dhe për urgjencat
e këtyre viteve. Mendoj se politika duhet të reflektojë në dy fronte. Nga njëra anë,
mbi formimin që u duhet dhënë brezave të rinj; duhet kuptuar se kur miratohet një
ligj, ai pasohet njëkohësisht nga një ndikim kulturor i caktuar. Kjo është përmasa
e parë, themelore. Nga ana tjetër, kemi edhe përmasën tipike, të veçantë, të përgjegjësisë
për formimin në jetën politike. Nuk është normale, që, të paktën prej vitesh, në Itali
mungojnë lëvizjet rinore brenda partive. Sa i rëndësishëm është formimi i
vazhdueshëm i krishterë për besimtarët e impenjuar në politikë? I krishteri
që impenjohet në politikë e di se roli i tij nuk është i thjeshtë e nuk mund të kuptohet
si një punë apo zanat i zakonshëm. Shpresoj, që i krishteri ta ndjejë si vokacion
impenjimin në politikë e që këtej, roli i tij të bëhet mision për të qenë dëshmitar
i vërtetë. Gjëja e parë që i kërkohet një dëshmitari është transparenca: pra, jeta
dhe mesazhi duhet të pasqyrojnë njëri-tjetrin. Për të qenë koherente, dëshmia duhet
mbështetur nga përvoja e fesë dhe e përshpirtërisë. Relativizmi mbretëron
në shoqërinë e sotme. Sipas jush, politikanët e krishterë duhet të impenjohen më shumë
për të mbrojtur jetën dhe familjen? Nga kjo pikpamje, mendoj se duhet të impenjohen
jo vetëm katolikët, por edhe të gjithë personat, që besojnë në vlerën e jetës e mendojnë
se e vërteta mund të arrihet e mund të shndërrohet në kulturë e sjellje. Mbrojtja
e jetës dhe e familjes i kapërcen kufijtë e përkatësisë politike, bën pjesë në kërkimin
e së mirës së përbashkët. E rëndësishme është që në bazën e ligjeve të mos gjejë vend
ai lloj relativizmi, që i konsideron dëshirat personale, si të ishin të drejta. Duhet
kërkuar platforma e përbashkët, që na vjen nga ligji dhe e drejta natyrore.