Benedikti XVI priti presidentin e Moldovës ad interim
(24.05.2010 RV)Po sot, Benedikti XVI priti në audiencë kryetarin e Parlamentit,
president ad interim i Republikës së Moldovës, Mihail Ghimpu. Pas takimit me Papën,
presidenti i Moldovës bisedoi edhe me kardinalin Tarçizio Bertone, sekretar i Shtetit
të Vatikanit dhe me Imzot Dominik Mambertì, sekretar për marrëdhëniet me shtetet. Gjatë
bisedimeve të përzemërta – njofton një komunikatë e Sallës së Shtypit të Vatikanit
– u fol kryesisht për situatën në vend, duke uruar që çdo pengesë të kapërcehet me
rrugën e dialogut. U njoh kontributi pozitiv i Kishës katolike në Moldovë, në ndihmë
të popullsisë e u vlerësua lart dialogu frytdhënës ndërmjet Kishës e autoriteteve
të vendit. Së fundi, u shkëmbyen këndvështrime mbi temat aktuale të marrëdhënieve
ndërkombëtare, ndërmjet të cilave, tema e identitetit kulturor e fetar të kontinentit
evropian. Kujtojmë se Moldavia, zyrtarisht Republika e Moldovës, është shtet i Evropës
lindore. Me shtrirje territoriale ndërmjet Rumanisë e Ukrainës, numëron 4. 320. 490
banorë. Pas një historie të trazuar, me kalime nga Rumania në Bashkimin Sovjetik,
më 27 gusht 1991 këputi lidhjet me vendin e sovjetëve, për t’u shpallur vend i pavarur,
republikë parlamentare e shtet asnjanës.