Papa në plenaren e shekullarëve: “Kemi nevojë për politikanë të krishterë koherentë,
të gatshëm për dialog e bashkëpunim”.
(21.05.2010 RV)“Ndjehet nevoja për politikanë vërtetësisht të krishterë” –
këtë theksoi sot Benedikti XVI, duke pritur në audiencë pjesëmarrësit në asamblenë
plenare të Këshillit Papnor për Laikët, mbledhur këto ditë në Romë për të shkëmbyer
mendime mbi temën: “Dëshmitarë të Krishtit në bashkësinë politike”. Papa ripohoi
se është e nevojshme të promovohen vlerat, për të cilat flitet në Doktrinën Shoqërore
të Kishës, si jeta, familja, solidariteti me të varfërit, liria, mbrojtja e pasurisë
së përbashkët, pa të cilat nuk mund të ketë zhvillim të vërtetë në shoqëri. Nga
ana e të pranishmëve, Papën e përshëndeti kardinali Stanislao Rilko, kryetar i dikasterit
papnor.
“Të krishterët nuk kërkojnë hegjemoni politike, as kulturore, por impenjohen
në të dy krahët, me bindjen se Krishti është guri i themelit në çdo ngrehinë njerëzore”:
këtë nënvizoi Benedikti XVI, duke kujtuar, më pas, se ndjehet fort nevoja për shekullarë-
dëshmitarë të Ungjillit në të gjitha veprimtaritë që kryejnë e në të gjitha mjediset,
ku jetojnë e punojnë: “U takon besimtarëve laikë të dëshmojnë në jetën personale
e familjare, në jetën shoqërore, kulturore e politike, se feja krijon kushtet për
ta lexuar në mënyrë të re e të thellë realitetin e edhe për ta shndërruar atë; se
shpresa e krishterë e zgjëron horizontin e kufizuar të njeriut dhe e çon atë drejt
lartësisë së vërtetë, drejt Zotit; se e vërteta, e thënë me dashuri, është forcë e
madhe, e aftë për t’ia ndryshuar faqen botës; se Ungjilli është garanci lirie e kumt
çlirimi”. Më pas vuri në dukje se parimet themelore të Doktrinës Shoqërore
të Kishës janë tejet aktuale, me vlerë të veçantë për hapjen e rrugëve të reja të
zhvillimit, në shërbim të çdo njeriu. Fjalë këto, që u pasuan nga nxitja e fuqishme: “U
takon akoma besimtarëve shekullarë të marrin pjesë gjallërisht në jetën politike,
në përkim gjithnjë më të plotë me mësimet e Kishës, duke luftuar së bashku për mbrojtjen
e të njëjtave ideale, në dialektikën demokratike e në kërkim të përhershëm të mirëkuptimit
me të gjithë ata, që e kanë për zemër mbrojtjen e jetës e të lirisë, të së vërtetës
e të familjes; që janë gjithnjë solidarë me nevojtarët e në kërkim të vazhdueshëm
të së mirës së përbashkët”. Duke kujtuar paraardhësit, Papa pohoi se politika
është fushë shumë e rëndësishme e ushtrimit të dashurisë së krishterë. Kërkon
nga të krishterët impenjim të fuqishëm në shërbim të bashkëqytetarëve, për sigurimin
e një jete më të mirë në të gjitha kombet e për një prani më të frytshme në selitë
e në programet e bashkësisë ndërkombëtare: “Kemi nevojë për politikanë vërtetësisht
të krishterë që, para së gjithash, të jenë dëshmitarë të Ungjillit në bashkësinë civile
e politike. Kjo detyrë, që duhet mirëkuptuar në veprimtarinë edukative të bashkësisë
kishtare, kërkon forma të reja shoqërimi e mbështetjeje nga ana e Barinjve”. Pjesëmarrja
e të krishterëve në shoqata e në lëvizje – vijoi Papa – mund të jetë një shkollë e
mirë për këta dishepuj e dëshmitarë, të mbështetur nga pasuria karizmatike, komunitare,
edukative e misionare, tipike për këtë realitet. Kohët në të cilat po jetojmë – reflektoi
Benedikti XVI – shtrojnë para nesh një mori problemesh të mëdha e të ndërlikuara.
Çështja shoqërore është bërë tashmë edhe çështje antropologjike. Kështu u shpreh
Benedikti XVI e, në vijim, theksoi rrezikun e përhapjes së relativizmit të turbullt
kulturor, të individualizmit utilitaristik e të hedonizmit, që shikon vetëm dobinë
e kënaqësinë vetjake, pa pyetur fare për të tjerët, gjë që e dobëson demokracinë dhe
krijon kushtet e përshtatshme për sundimin e pushteteve të forta, të cilat mund ta
dredhojnë rrugën e kësaj demokracie: “Duhet rifituar e rigjallëruar dija
e vërtetë politike. Politikani duhet të jetë kërkues në veprimtaritë, që kanë të bëjnë
me kompetencën e tij; t’u shërbejë me vështrim kritik kërkimeve në shkencat humane;
të përballojë realitetin në të gjitha aspektet, duke i kapërcyer ngushtimet ideologjike
ose pretekstet utopike”. Më tej, politikanët duhet të jenë gjithnjë të
gatshëm për dialog e bashkëpunim, duke pasur mirë parasysh se politika është edhe
art i ndërlikuar i drejtpeshimit ndërmjet idealeve e interesave. Gjithsesi – kujtoi
Ati i Shenjtë – nuk duhet harruar se kontributi i të krishterëve është vendimtar,
vetëm në se inteligjenca e fesë bëhet inteligjencë e realitetit, kyç gjykimi e shndërrimi.
Duhet bërë një revolucion i vërtetë dashurie – përfundoi Papa. E ky revolucion duhet
të jetë vepër e breznive të reja, të thirrura për një impenjim shoqëror e politik,
që nuk bazohet mbi ideologjitë ose interesat e pjesëshme, por mbi dëshirën për t’i
shërbyer njeriut dhe së mirës së pëbashkët, në dritën e Ungjillit.