Jepet njoftimi për krijimin e qelizës së parë artificiale, që mund të riprodhohet
(21..05.2010 RV)E çuditi botën shkencore lajmi, botuar dje nga revista ‘Shkenca”,
për qelizën e parë artificiale, ndërtuar në laborator, që është e aftë të ndahet e
të shumëzohet, si çdo qelizë tjetër e gjallë. Rezultati u arrit në SHBA, pranë Institutit
të gjenetistit Craig Venter. Kryetari i nderit i Akademisë Papnore për Jetën, imzot
Elio Sgreçia, pohoi, në mikrofonin e Radio Vatikanit, se nuk bëhet ende fjalë për
krijimin e një jete artificiale, por për një manipulim, për një shndërrim. Progres
ky - shtoi – që gjithsesi u kujton protagonistëve të këtij kërkimi shkencor se nuk
duhet ta harrojnë përgjegjësinë e tyre. Por cili është rezultati real i eksperimentit
të përfunduar me sukses nga grupi amerikan, kryesuar nga Venter? Përgjigjet gjenetisti
Bruno Dalapikola, drejtor shkencor i Spitalit të “Krishtit Fëmijë” në Romë:
Përgjigje:
- Origjinaliteti i punës së tij, është origjinalitet i gjithë grupit: bëhet
fjalë për krijimin, së pari, të një kromozome artificiale dhe aftësisë së saj për
t’u riprodhuar. Duhet pasur parasysh se kjo nuk ka të bëjë fare me idenë se ndokush
mendon të krijojë organizma shumëqelizore kafshësh a njerëzish. Qelizat, realizuar
nga Craig Venter, janë njëshe. Teorikisht kanë mundësinë për të kryer funksione të
shumta, por mbeten, sigurisht, të kufizuara në botën njëqelizore.
Pyetje:
- Ç’mund të na thoni për arritjen e re, parë në këndvështrimin etik?
Përgjigje:
- Rëndësi ka të mos krijohet ndonjë gjë, që nuk është në ndihmë të njeriut,
por kundër tij. Ky është i vetmi problem etik. Unë – e përsëris – në këtë çast shoh
rikthimin e mundshëm të disa sëmundjeve, të njohura nga njerëzmi, i cili mund të ketë
dobi nga kjo arritje. Në këtë kuptim besoj se etikisht janë të pranueshme eksperimentet
e këtij tipi. Nuk do të jenë më të pranueshme, në çastin kur të bëhet ndonjë gjë,
që është kundër njeriut.
Pyetje: - Pra mund të pohojmë se nuk ka
kurrfarë rreziku në fushën e eugjenetikës?
Përgjigje: - Nuk
mendoj për eugjenetikën, por për krijimin e baktereve, që kanë për qëllim shkatërrimin
e njerëzimit. Ky është problemi i vetëm e konkret, që shikoj në këtë eksperiment.