Benedikti XVI ambasadores së Emirateve të Bashkuara Arabe: e vlerësoj lirinë e kultit
në vendin tuaj.
(20.05.2010 RV)Emiratet e Bashkuara Arabe janë një vend mysliman, që e mbron
lirinë e kultit dhe dinjitetin e shumë punëtorëve të huaj, që e kanë zgjedhur si vend
jetese: kështu iu drejtua Papa sot paradite, ambasadores së këtij shteti, të cilën
e priti në audiencë. Zonja Hisa Abdulla Ahmed Al-Otaiba është e para me detyrën e
ambasadores pranë Selisë së Shenjtë, që nga lidhja e marrëdhënieve ndërmjet dy vendeve,
më 31 maj 2007. Diplomatja poliglote dhe plurilaureate, me specializime në Amerikë
e Zvicër, nënë e katër fëmijëve, përfaqëson një vend të pasur me naftë e gaz, me 4
milion banorë e me 70% të punëtorëve të huaj, që vijnë nga Lindja e Mesme dhe e Largët.
Pikërisht për ta, Benedikti XVI tha: “Hapja e Emirateve të Bashkuara Arabe
për punëtorët e huaj, kërkon një impenjim të vazhdueshëm për forcimin e kushteve të
nevojshme për bashkëjetesën paqësore dhe përparimin shoqëror, e për këtë, vendi duhet
lavdëruar. Dëshiroj të vërej me kënaqësi se ka shumë kisha katolike, të ndërtuar mbi
toka të dhuruara nga autoritetet publike. Është dëshirë e Selisë së Shenjtë që ky
bashkëpunim të vazhdojë e të zhvillohet, mbi bazën e nevojave baritore në rritje të
popullsisë katolike”. Liria e kultit, theksoi Papa, kontribuon në të mirën
e përbashkët e në harmoninë shoqërore. E duke e zgjeruar arsyetimin edhe mbi gjendjen
aktuale ndërkombëtare, Benedikti XVI vuri në dukje si duhen shfrytëzuar teknologjia
e zhvillimi i sotëm: “Me të vërtetë, janë burrat e gratë, të kuptuar si unikë
në natyrën që u ka dhënë Zoti, qëllimi i çdo politike, kulture, tekonologjie e zhvillimi.
Reduktimi i objektivave të këtyre përjekjeve njerëzore thjesht në qëllime fitimi apo
leverdie vë në rrezik centralitetin e njeriut në përgjithësi, si pasuri kryesore për
t’u mbrojtur e vlerësuar”. Selia e Shenjtë, nënvizoi Benedikti XVI, punon
shumë për ta ruajtur këtë vizion të qartë mbi njeriun në arenën ndërkombëtare, që
t’i shërbejë kështu sa më mirë zhvillimit të popujve e të kombeve. Kjo është edhe
dëshira e kontributi i të krishterëve, që jetojnë në Emiratet e Bashkuara Arabe, përfundoi
Papa.