(19.05.2010 RV)Greva e urisë e socialistëve dhe e përkrahësve të tyre para
kryeministrisë në Tiranë, arriti sot në ditën e saj të 19-të. Deri tani, 66 vetë janë
larguar për arsye shëndetësore, por sipas deputetit Namik Dokle, i gjithë Grupi parlamentar
i Partisë Socialiste dhe mbi 2000 simpatizantë të tjerë janë gati të hyjnë në grevë,
nëse është e nevojshme. Familjarët e grevistëve protestuan sot para selisë së
Komisionit Evropian, duke kërkuar transparencë për zgjedhjet e 28 qershorit të kaluar.
Ndërkaq, dje, ambasadori i OSBE-së në Shqipëri, Robert Bosch, përmes një deklarate
për mediat, kërkoi që klasa politike shqiptare të gjejë pa humbur kohë një zgjidhje
të përshtatshme për të dyja palët, në përputhje me parimin e transparencës dhe me
kornizën ligjore shqiptare. Edhe sot, ambasadori i Komisionit Evropian, Helmut Lohan
deklaroi qartas se dialogu politik është element i nevojshëm për integrimin në Bashkimin
Evropian. Zoti Lohan foli në konferencën me temë “Mbështetja italiane për integrimin
e Shqipërisë në Bashkimin Evropian”, që u zhvillua sot paradite në kuadrin e veprimtarisë
“Dy popuj, një det, një miqësi. Të pranishëm, kryeministri Sali Berisha dhe autoritete
shqiptare e italiane në nivel ministrash.