Kardinali Bredi do të vazhdojë mandatin e tij. Paraqitet raporti i dytë mbi abuzimet
e klerit me të mitur në Kishën irlandeze.
(18.5.2010 RV)Kardinali Shon Bredi, primat i gjithë Irlandës do të vazhdojë
mandatin e tij. Kështu u bë e ditur gjatë komentimit të raportit të dytë të përvitshëm
të Komisionit kombëtar për mbrojtjen e të drejtave të fëmijëve në Kishën Katolike
të Irlandës, që u publikua dje. “E pres mirë këtë raport”, shkruan kardinali
Bredi duke falënderuar anëtarët e Komisionit për “përkushtimin e tyre të jashtëzakonshëm,
profesionalizmin dhe impenjimin që treguan duke mbështetur dëshirën e sinqertë të
ipeshkvijve dhe të përgjegjësve të Kongregatave fetare të bëhen shembullorë në zbatimin
më të mirë të tutelës së fëmijëve”. Shpresoj, - shton prelati, që raporti
t’i sigurojë të gjithë se, ndonëse mbeten ende sfida të rëndësishme, Kisha katolike
e Irlandës ka bërë shumë rrugë për të ndrequr gabimet e së kaluarës.” Dhe ndër lajmet
e mira veçojmë edhe përgatitjen e 2.356 personave që mund t’i përkushtohen sigurisë
së fëmijëve nëpër famullitë e të gjithë vendit, brenda muajve të ardhshëm. Po,
“nuk ka vend për vetëkënaqje” - vë në dukje kardinali Bredi. “Përvoja tragjike e së
kaluarës na kujton se është e nevojshme një vigjilencë e vazhdueshme. Në vitet që
më mbesin si kryeipeshkëv i Armag – nënvizon kardinali Bredi – do t’i përkushtohem
i tëri veprimtarisë për shërimin, pendimin dhe përtëritjen që Benedikti XVI po i tregon
kishës irlandeze, duke u nisur nga përparimet e dukshme realizuar gjatë këtyre viteve
për mbrojtjen e fëmijëve.” Prelati i gjithë Irlandës, duket se ka ndërmend
ta vazhdojë mandatin e tij, pas polemikave që kanë dalë në shesh gjatë muajve të kaluar
në lidhje me përfshirjen e tij në mbulimin e një rasti pedofilie në vitet ’70, e pas
keqardhjes që ai shprehu për mangësitë në punën e vet, më 17 marsin e kaluar, ditën
e festës së Shën Patrikut, Pajtor i Irlandës. Kardinali Bredi i kërkon ndihmë
Papës në këtë deklaratë që të ndihmohet prej një ipeshkvi ndihmës për drejtimin e
krizës së abuzimeve seksuale që ka përfshirë kishën e vendit të tij. Në raportin që
u paraqit dje, Komisioni i ngarkuar, tregon me dokumente se, nga 1 prilli 2009 deri
në 31 marsin e 2010, janë mbledhur afro 200 denoncime për abuzime. Të gjitha i janë
përcjell autoriteteve civile.