90 vjet nga lindja e Shërbëtorit të Zotit, Gjon Pali II
(18.05.2010 RV)U përkujtua sot 90-vjetori i lindjes së Papës së paharruar Gjon
Pali II. Në të gjithë botën, Kisha Katolike përshkoi jetën dhe veprat e Shërbëtorit
të Zotit, që pret lumnimin, në aktivitete të ndryshme, seminare e mbrëmje tematike. Në
Romë, në Universitetin e Lirë të Zojës së Ngjitur në Qiell (LUMSA), u zhvillua takimi
me temë “Papnia e papritur e Gjon Palit II”, organizuar nga Qendra Universitare Katolike
e Konferencës Ipeshkvnore Italiane. U paraqitën rezultatet e një studimi mbi Romën,
Italinë dhe botën në papninë e Gjon Palit II. Po në kryeqytetin italian, në Universitetin
Papnor “Regina Apostulorum” u mbajt një mbrëmje tematike me titull “Njeriu i ardhur
nga larg. Homazh për Gjon Palin II”, organizuar sëbashku me Qendrën Paskal. Gjatë
takimit, përveç kujtimit të Papës Vojtila, u dhanë infromacione edhe për Qendrën e
Studimit “Gjon Pali II” brenda universitetit. I impenjuar edhe universiteti shtetëror
Roma Tre, ku sot paradite u zhvillua seminari me temë “Uragani Vojtila. Reagimet
pas zgjedhjes së Gjon Palit II”. E para nga tre sesionet e punës u ndal në reagimet
ndaj vendimit të Konklavës, në tetor 1978, nga ana e Evropës Perëndimore, sidomos
të Francës, Gjermanisë, të sferës katolike italiane dhe të Italisë laike. Më pas,
vëmendja u përqendrua në të dyja kampet e Perdes së Hekurt, me analizën e reagimeve
të Bashkimit Sovjetik, Polonisë, SHBA-ve dhe Britanisë së Madhe. Në pjesën e fundit
të seminarit, u shqyrtuan vlerësimet e analistëve në Amerikën Latine, në Egjipt e
në botën arabe, në Kinë e Japoni, duke i krahasuar me ato evropiane.
“Mos
kini frikë! Hapjani, madje në dy kapakë, portat Krishtit! Pushtetit të Tij shëlbues
hapjani kufijtë e shteteve, të sistemeve ekonomike dhe të atyre politike, fushat e
gjëra të kulturës, të qytetërimit, të zhvillimit. Mos kini frikë! Krishti e di ç’ka
brenda njeriu. Vetëm Ai e di!” (Gjon Pali II, homelia e meshës së fillimit të papnisë,
22 tetor 1978). E kush nuk i kujton këto fjalë të Papës Gjon Pali II, në meshën
e fillimit të papnisë, më 22 tetor 1978. Karol Jozef Vojtila, që lindi si sot, më
18 maj 1920 në Vadovice të Polonisë, ka qenë ipeshkvi i 264-t i Romës, papë i Kishës
e kreu i Qytet-Shtetit të Vatikanit. U zgjodh papë më 16 tetor 1978 e menjëherë pas
vdekjes, më 2 prill 2005, u hap procesi i lumnimit të tij. Benedikti XVI e shpalli
“të nderuar” nga Kisha më 19 dhjetor 2009. Gjon Pali II ka qenë i pari papë jo
italian që prej 455 vjetësh, pra, që nga koha e hollandezit Adrian VI (1522-1523).
Gjithashtu, ka qenë papa i parë polak e sllav i historisë. Që në fillim të papnisë,
Karol Vojtila ndërmori një fushatë të fuqishme kundër komunizmit dhe shtypjes politike
e mund të konsiderohet, pa dyshim, një nga protagonistët e rënies së sistemit të socializmit
real, të kontrolluar nga Bashkimi Sovjetik. Qe kritik edhe kundër Teologjisë së Çlirimit,
duke ndërhyrë disa herë në rastet kur eksponentë të klerit afroheshin me politikanët
marksistë. Por qe i ashpër edhe më kapitalizmin e shfrenuar e me konsumizmin, të cilët
i konsideronte të kundërt me drejtësinë shoqërore, me barazinë ndërmjet popujve e
për këtë arsye, kundër dinjitetit të njeriut. Në fushën e moralit, kundërshtoi me
forcë abortin e konfirmoi mësimet e Kishës mbi seksualitetin, celibatin e meshtarëve
dhe meshtarinë femërore. Mëse 100 udhëtimet e tij nëpër botë u karakterizuan nga
pjesëmarrja e turmave të stërmëdha, që nuk ishin parë kurrë në takime me karakter
fetar. Ky rrjet i madh kontaktesh, edhe me brezat e rinj, nëpërmjet Ditëve Botërore
të Rinisë, u interpretua si qëllim i tij serioz për të ndërtuar ura ndërmjet kombeve
e feve të ndryshme, në shenjën e ekumenizmit, pikë tjetër e rëndësishme e papnisë
së tij. Më 14 mars 2004, papnia e tij tejkaloi atë të Leonit XIII, si papnia e
tretë më e gjatë në histori.