Skadoi ultimatumi qeveritar në Tajlandë. Këmishëkuqtë kërkojnë armëpushim.
(17.05.2010 RV)Gjakderdhje e re mund të ndodhë në Bangkok të Tajlandës, ku
ushtria përgatitet të sulmojë manifestuesit antiqeveritarë. Ultimatumi i qeverisë
për evakuimin e qendrës së kryeqytetit skadoi sot paradite në orën 10.00 (me orën
e Shqipërisë). Deri tani, viktimat arrijnë në 30 vetë, ndërsa 300 të tjerë janë plagosur.
Tensioni është në rritje. Kryeipeshkvi katolik i Bangkokut u bëri thirrje palëve të
ulen në tryezën e bisedimeve. Edhe këmishëkuqtë i kanë kërkuar qeverisë armëpushim.
Të dëgjojmë gazetarin italian Stefano Vekia, që ndodhet në Bangkok, pikërisht në shtabin
e përgjithshëm të këmishëkuqëve antiqeveritarë: Në këtë çast,
gjendja është absolutisht dramatike… Dëgjohen vazhdimisht të shtëna. Unë nuk ndodhem
në selinë qendrore, pasi është e ndaluar të hysh e nëse do të kisha shkuar, sapo të
kisha dalë prej andej mund të më burgosnin për dy vjet. Gjendem në vendin ku dje u
mblodhën këmishëkuqtë për t’i dhënë një të shtyrë reparteve të ushtrisë në jug të
protestës. Sot në mesditë, qindra vetë dolën nga barrikadat dhe po ecin me flamujt
tajlandezë deri ku të munden. Është një sfidë e hapur. Pra, akoma nuk ka filluar
kundërofensiva e ushtrisë për të spastruar qendrën. A dëgjohen të shtëna? Nuk
ka filluar akoma ofensiva, por ka luftime të ashpra në Prasong Road, që është rruga,
e cila çon drejtpërdrejt në sektorin kryesor të protestës e andej priten tanket dhe
trupat. Luftimet me këmishëkuqtë janë tepër të ashpra e që nga nata e kaluar kanë
impenjuar të gjitha repartet e qeverisë, që avancojnë me vështirësi. Pjesa
më e madhe e viktimave të sotme ranë pre e çekinëve, të cilët, siç thuhet, nuk bëjnë
pjesë në radhët e ushtrisë. A mund ta konfirmoni këtë lajm? Ajo që mund të
them, sepse natyrisht nuk ka burime zyrtare për këtë, është se na pohojnë – e duket
e vërtetë – se ushtarët ua kanë lënë këtë punë, veçanërisht “të ndyrë”, grupeve rivale
të këmishëkuqve. Thuhet se janë thirrur madje mercenarë kamboxhianë për të qëlluar
kundër tajlandezëve. A ekziston rreziku i një lufte civile? Do të varet
shumë nga zhvillimet e orëve të ardhshme. Në teori, ushtria, apo më mirë, qeveria
në vështirësi, mund të kërkojë mbështetjen e grupeve besnike, monarkiste e nacionaliste,
të ashtuquajturit “këmishëverdhë” e “këmishëshumëngjyrësh”. Që gjatë këtyre ditëve
ata janë ndeshur me këmishëkuqtë, megjithëse në mënyrë të kufizuar.