Mesazh i dikasterit për Dialogun Ndërfetar, me rastin e Vesakh: “Të krishterë e budistë
së bashku për të forcuar ‘vetëdijen ekologjike”.
(17.05.2010 RV)Bota ka nevojë ta kuptojë thellësisht përgjegjësinë ekologjike;
përpjekjet e përbashkëta të budistëve e të krishterëve mund të kontribuojnë për ta
bërë konkret jo vetëm respektin për natyrën por, më në përgjithësi, për jetën e dinjitetin
e njeriut. Kështu shkruan kardinali Zhan-Lui Toran, kryetar i Këshillit Papnor për
Dialogun Ndërfetar, në mesazhin tradicional të urimeve, drejtuar me rastin e festës
budiste të Vesakh. Në vitin 2010 kjo festë kremtohet më 21 e 28 maj në shumë vende
të Azisë. “Nuk mund të nderohet me të vërtetë jeta njerëzore, duke shfrytëzuar
pa kujdes, ose edhe më keq, duke shkapërderdhur pasuritë e tokës, ku banon mbarë njerëzimi”.
Është kjo zemra e reflektimit të kardinalit Toran për festën e Vesakh, kremtim i fundmajit,
në të cilin budistët përkujtojnë ndriçimin e Budës. Kriza ambientale – vijon Hirësia
e Tij – krijon probleme të vështira e vuajtje të mëdha në mbarë botën. Përballë kësaj
situate, të krishterët e budistët, të cilët kanë të njëjtin respekt të thellë për
jetën, e shikojnë si veprimtari me rëndësi të dorës së parë inkurajimin e të gjitha
forcave, që synojnë krijimin e ndjenjës së përgjegjësisë ekologjike si dhe afirmimin
e bindjeve të përbashkëta për paprekshmërinë e jetës njerëzore, në çdo fazë e kusht,
për dinjitetin e njeriut e misionin e familjes së vetme, në të cilën mësohet të duash
të afërmin e të respektosh natyrën.
Duke kujtuar disa nga pohimet e Benediktit
XVI për temën e respektimit të Krijimit, kryetari i Këshillit Papnor për Dialogun
Ndërfetar ripohon se Kisha katolike e shikon mbrojtjen e ambientit lidhur ngushtë
me temën e zhvillimit të gjithanshëm të njeriut e se, nga ana e saj, nuk impenjohet
vetëm në mbrojtjen dhe destinacionin universal të dhuratave të tokës, të ujit e të
ajrit, por inkurajon edhe të tjerët të bashkojnë forcat në krijimin e vetëdijes ekologjike,
për të mbrojtur njerëzimin nga vetëshkatërrimi.“Të promovojmë, së bashku, lidhje korrekte
ndërmjet njerëzve e mjedisit – nxit në përfundim kardinali Toran. Duke shumëfishuar
përpjekjet tona për krijimin e vetëdijes ekologjike në shërbim të bashkëjetesës së
qetë e paqësore – pohon - mund të japim dëshminë e stilit, që e respekton jetën, që
e gjen kuptimin e saj jo në përpjekjen për të pasur më shumë, por për të qenë më shumë.
E, përveç kësaj, duke i ndarë bashkë perspektivat dhe impenjimet e traditave tona
përkatëse fetare, mund të japim ndihmesën tonë për mirëqenien e mbarë botës”.