Լուրեր հայկական կեանքէն

Սպանացի Գրող Կոնզալօ Կուարաչայի «Հայկական Կտակը» Գիրքին Շնորհահանդէսը Մոսկուայի Մէջ:

Մոսկուայի մէջ «Նովոստի» գործակալութեան մամլոյ կեդրոնին մէջ տեղի ունեցաւ սպանացի գրող Կոնզալօ Կուարաչայի «Հայկական Կտակը» գիրքի շնորհահանդէսը, զոր կազմակերպած էր Ռուս-հայկական համագործակցութիւն կազմակերպութիւնը՝ Պատմական հեռանկարի հիմնադրամին եւ Հայաստանի մօտ Սպանիոյ հիւպատոսի համագործակցութեամբ:

Կուարաչայի գիրքը նուիրուած է փոքր ժողովուրդներուն՝ հրեաներուն, քիւրտերուն, հայերուն: Իր գործերուն համար սպանացի գրողը արժանացած է զանազան պարգեւներու: «Հայկական Կտակը» հայ ժողովրդին նուիրուած եռապատման երկրորդ գիրքն է: Երրորդի խորագիրն է «Սպիտակ լեռը» եւ նուիրուած է Ցեղասպանութենէն ետք Լիբանան գաղթած հայերու պատմութեան: Ան երեք գիրք գրած է հայկական նիւթով՝ «Հայկական Տոհմածառը», «Հայկական Կտակը» եւ «Սպիտակ լեռը»:

Ապրիլեան Մեծ Եղեռնի ոգեկոչում սուրբ Գրիգոր Լուսաւորիչ - սուրբ Եղիա եկեղեցւոյ սրահին մէջ
Պէյրութ, Կիրակի, 25 Ապրիլ 2010, երեկոյեան ժամը 7.00-ին, սուրբ Գրիգոր Լուսաւորիչ - սուրբ Եղիա եկեղեցւոյ սրահին մէջ տեղի ունեցաւ Ապրիլեան Մեծ Եղեռնի 95-րդ ամեակի ոգեկոչում, հովանաւորութեամբ Ամենապատիւ Տէր Ներսէս Պետրոս ԺԹ. Կաթողիկոս Պատրիարք Տանն Կիլիկիոյ Կաթողիկէ Հայոց եւ նախագահութեամբ Արհիապատիւ Հայր Յովհաննէս Եպս. Թէյրուզեանի։ Ձեռնարկին մասնակցեցան պետական երեսփոխան Սերժ Թուրսարգիսեան եւ նախարար Ժան Օղասապեան։
Բացման խօսքը կատարեց սուրբ Գրիգոր Լուսաւորիչ - սուրբ Եղիա եկեղեցւոյ ժողովրդապետ՝ Հայր Եղիա Ծ.Վ. Եղիայեան։ Յայտագիրը ընդգրկեց կլոր սեղան՝ «Հայաստան-Թուրքիա Արձանագրութիւնները» եւ Միջազգային Արդարադատութիւնը թեմայով, զոր վարեց Փաստ. Էլիզապէթ Զախարիա-Սիուֆի արաբերէն լեզուով, եւ բանախօսեցին՝ Պետական երեսփոխան Ղասան Մուխայպէր եւ Փաստ. Էմիլ Աուն։