Britani e Madhe: Nisin konsultimet për qeveri të re.
(11.05.2010 RV)Në Londër filluan negociatat e para zyrtare ndërmjet laburistëve
dhe liberal-demokratëve për formimin e një qeverie të re. Në fillim, pas zgjedhjeve
të 6 majit, nga të cilat asnjë parti nuk doli fituese, pati kontakte ndërmjet konservatorëve
të Dejvid Kameron dhe liberal-demokratëve të Nik Kleg. Ndërkaq, kryeministri i tashëm
Gordon Brown lajmëroi dje se ka ndërmend të japë dorëheqjen si udhëheqës i partisë
laburiste. Po si duhet gjykuar kjo lëvizje e Braun? Me ne profesori i historisë
së marrëdhënieve ndërkombëtare të Universitetit të Padovës Antonio Varsori:
Përgjigje:
Besoj se është një përpjekje për të dhënë ndonjë mundësi më tepër partisë laburiste.
Braun, pavarësisht nga përvoja e tij si kryetar qeverie, ndoshta mendon se duke sakrifikuar
veteveten, do t’i japë ndonjë mundësi më shumë partisë laburiste për t’i ruajtur kontaktet
me liberal-demokratët dhe për të parë nëse ka mundësi për një koalicion qeverisës
me ta.
Pyetje: Sidoqoftë, konservatorët dhe liberal-demokratët në këto çaste,
po vazhdojnë me diskutimet për reformën elektorale. Cila është arsyeja?
Përgjigje:
Ky është një nga kushtet themelore që kanë vendosur liberal-demokratët. Një ndryshim
i sistemit elektoral mund t’i favorizojë në çfarëdolloj votimesh të ardhshme. Duhet
të them, se ky ka qenë ngahera një fakt me tepër rëndësi për jetën politike angleze.
Sistemi zgjedhor anglez, ka pasur probleme sepse duke qenë mazhoritar, e për më tepër
i bazuar tek secila zonë në veçanti, i ka çuar anglezët drejt disa situatave që mund
të quhen të çuditshme, që nuk pasqyrojnë vullnetin e elektoratit anglez. Nga ana tjetër,
elektoratit anglez, në përgjithësi, i ka pëlqyer ky sistem sepse i ka garantuar qeveri
të forta dhe jetëgjata.