Dorëzohet për botim vëllimi i dytë i librit të Papës "Jezusi i Nazaretit"
(10.05.2010 RV)Salla e Shtypit e Vatikanit komunikoi sot se gjatë ditëve të
kaluara është dorëzuar për botim teksti përfundimtar i vëllimit të dytë të librit
të Papës Benedikti XVI, me titull “Jezusi i Nazaretit”. Ky vëllim, që u kushtohet
Mundimeve dhe Ngjalljes së Krishtit, është vazhdim i të parit. Origjinali në gjuhën
gjermane i është besuar si Manuel Herderit, që është botuesi i veprës së plotë të
Jozef Racinger, ashtu edhe don Xhuzepe Kostës, drejtor i Shtëpisë Botuese të Vatikanit. Ky
i fundit – shpjegohet në notën e Sallës së Shtypit – është botuesi kryesor dhe prej
tij do të merren të drejtat e autorit, do të botohet edicioni në gjuhën italiane dhe
do t’u besohet botuesve të tjerë përkthimi në gjuhë të ndryshme nga origjinali gjermanisht.
Shpresohet që libri të botohet njëkohësisht në disa gjuhë, prandaj për t’i dhënë kohë
përkthimit, dalja në librari parashikohet pas disa muajsh.