(08.05.2010 RV)Sot paradite mijëra besimtarë u mblodhen në Shenjtëroren e Zojës
Rruzare të Pompeit. Sipas traditës, u kremtua lutja, e shkruar në vitin 1883, nga
themeluesi i Shenjtërores, i Lumi Bartolomeo Longo. Sivjet lutjen e kryesoi kardinali
Agostino Valini, mëkëmbës i Papës për dioqezën e Romës. Po cila është domethënia
e kësaj lutjeje, që kremtohet njëkohësisht në të gjitha Kishat e Botës? Pyetëm kryeipeshkvin
e Pompeit, imzot Karlo Liberatin:
Përgjigje: - Pompei nuk ekzistone.
Si lindi? Lindi, para së gjithash, nga një gjeni, një katolik, i cili e kishte humbur
rrugën. Lindi nga intuita profetike që Bartolomeo Longo, avokat i ri, pati në një
nga rrugët fshatarake të Pompeit, pasi u kthye tek Zoti, pas një periudhe të shkurtër
hutimesh rinore. Nuk e dimë në se iu duk Zoja, apo i foli zemrës së tij. Ai vetë pohoi
se papritmas u gjunjëzua e, i goditur si me rrufe nga hiri, dëgjoi një zë, që e ftonte
t’ia kushtonte jetën devocionit të Rruzares dhe përhapjes së saj, duke e bërë luginën
e Pompeit vend kushtuar Jezusit e Zojës së Bekuar e pikë referimi për gjithë Kishën.
“Thuaje Rruzaren – tha zëri - e do të shpëtosh. Kushdo që do ta thotë Rruzaren, nuk
do të humbasë!”. Pas kësaj ngjarjeje të 2 tetorit 1872, Bartolomeo Longo bleu një
truall për ngritjen e Shenjtërores, me pëlqimin e ipeshkvit të Nolës. Guri i parë
i këtij tempulli qe vënë pikërisht më 8 maj të vitit 1976. Pas kësaj ngjarjeje, lugina,
që nuk e donte askush, u mbush me vepra të dashurisë së krishterë: jetimore për bijtë
e bijat e të burgosurve, për të gjithë të braktisurit, për fëmijët e rrugës; jetimët
e luftës, vajzat e flakura në rrugë të madhe... Kjo lindi në emër të dashurisë
së krishterë, sepse gjetëm edukatorë, që u mësuan vajzave e djemve si duhet jetuar!
Dy
fjalë për vendin ku kremtohet: Lutja, e kremtuar pranë Pompeit, të rrënuar
nga një shpërthim vullkanik, duket sikur i bën këto gërmadha të lashta, të flasin,
të qortojnë, të kujtojnë se fati i njeriut është i pasigurtë; se siguria mund të gjindet
vetëm tek Ungjilli që shpëton, që shëlbon! E Rruzarja është një shtesë e frytshme
e Ungjillit, për t'ia kumtuar Krishtin një shoqërie, që po largohet përherë e më shumë
nga vlerat e krishtera. Por Rruzarja është edhe lutje gjithnjë aktuale për të përhapur
mesazhin e paqes, posaçërisht në fillimin e një mijëvjeçari, i cili është fshikulluar
nga erërat e acarta të pasigurisë ekonomike e shpirtërore. Në sfondin e Pompeit
të lashtë, Lutja drejtuar Zojës merr vlerë simbolike; na kujton sa i paqëndrueshëm
është fati i njeriut, sa të përkohshme, ëndrrat e shpresat e tij e sa nevojë ka mbarë
njerëzimi për një hov të ri të kumtimit të krishterë në kohët tona. E ky kumtim konkretizohet
posaçërisht në ftesën për vëllazërim universal.