Papa Rojeve të reja Zvicerane: “Shërbimi do t’ju ndihmojë për thellimin e fesë suaj”.
(07.05.2010 RV)Sot paradite Benedikti XVI priti në Vatikan, Rojet e reja Zvicerane,
që u betuan dje, të shoqëruar nga familjarët. Gjatë takimit, Papa vuri theksin mbi
lidhjen e veçantë ndërmjet Rojeve e Selisë Apostolike, duke i falënderuar për shërbimin
e tyre fisnik në mbrojtje të personit të tij. Kryejeni me përgjegjësi
e bujari shërbimin tuaj ndaj Papës e Selisë së Shenjtë: kjo ishte porosia, që u dha
Benedikti XVI 30 Rojeve Zvicerane, të cilët i priti në Sallën Klementine, së bashku
me familjarët, një ditë pasi bënë betimin. Papa u foli në të trija gjuhët e Konferderatës
Helvetike: gjermanisht, italisht e frëngjisht, duke vënë theksin tek lidhja e veçantë
e Rojeve Zvicerane me Pasardhësin e Shën Pjetrit. Përmes shërbimit tuaj – pohoi Benedikti
XVI - ju shikoni shtegtarin në kërkim të Zotit në çdo fytyrë burri a gruaje, që
takoni. E nënvizoi, më pas, vlerën e madhe të shërbimit të Rojeve Zvicerane, shërbim
që – u tha Benedikti XVI Rojeve të reja - do t’ju ndihmojë për thellimin e fesë suaj:
“Shërbimi juaj në ndihmë të Papës, do t’ju ndihmojë ta kuptoni më thellë
fenë e krishterë, e njëkohësisht do t’ju bëjë të aftë ta perceptoni më mirë edhe dinjitein
e njeriut, që kalon pranë jush e që kërkon në thellësi të shpirtit, rrugën drejt jetës
së pasosur”. I jetuar me vetëdije profesionale e me ndjesi të mbinatyrshme
– tha në vijim Papa - shërbimi juaj ju përgatit edhe për detyrat e ardhshme, personale
e publike, që do t’ju besohen, kur ta lini shërbimin, duke ju edukuar t’i kryeni si
dishepuj të vërtetë të Zotit. Audienca tek Papa ishte epilog i ceremonisë sugjestive
të betimit të 30 alabardierëve, që u kremtua dje pasdite në Sallën e Palit VI, në
praninë e presidentes së Konfederatës Helvetike, zonjës Doris Leuthard. Ceremonia
përkujton flijimin e 147 Rojeve Zvicerane, që derdhën gjakun për të mbrojtur Papën
Klementi VII, më 6 maj 1527, kur mbi Romën kaluan si uragan, ushtritë e lancikenekëve,
fjalë që ka kuptimin ‘shërbërtor i atdheut’. Ishin merecenarët, e rekrutuar në trojet
gjermane nga perandori Karli V, shumica luteranë, që e urrenin Romën e që prandaj,
kudo shkelën, lanë pas vdekje e shkatërrim, duke i dhënë fund edhe epokës së ndritur
të Rilindjes evropiane.
Tema e bindjes ishte në qendër të Fjalimit, që u drejtoi
rekrutëve, komandanti i Rojes Zvicerane, Danil Rudolf Anrig: “Jetojmë
në një çast, kur njerëzit e kanë humbur besimin në autoritetet, kur kudo sundon individalizmi
e egoizmi. Ç’na dallon, ne, Rojet Zvicerane? Pikërisht betimi ynë solemn për të mbrojtur
vlerat universale si bindja, besnikëria, drejtësia”.
Duke
folur pas Komandantit, kapelani i Truprojes Papnore, imzot Alë de Ramì, theksoi: “Nën
kaskë, brenda koracës e në divizë, ju keni frymën e vetmohimit, shpirtin, që dëshiron
vetëm të shërbejë. Shkëlqimi i veshjes nuk flet për ju, si individë, por vë në dukje
dinjitetin e Pasardhësit të Shën Pjetrit”.
Pas Himneve
kombëtare, të Vatikanit e të Zvicrës, arriti çasti më prekës, ai i betimit të rekrutëve
të rinj: “Ich / Hellebardier ... / schwöre / alles das...” Secili
nga alabardierët u betua në gjuhën amtare se do t’i shërbejë besnikërisht, sinqerisht
e ndershmërisht Atit të Shenjtë, duke e mbrojtur, po të jetë nevoja, deri në pikën
e fundit të gjakut. Pësëritën, kështu, moton e Rojes Zvicerane “Acriter et Fideliter”,
“Nder e Besnikëri”. Binom, ky, që e ka dalluar ushtrinë vogël, që kur u krijua, më
1506, me dëshirën e Papës Juli II, e deri më sot, kur di të bashkërendojë frymën e
traditës, me atë të kohëve moderne, në emër të Krishtit, në shërbim të Mëkëmbësit
të tij mbi tokë!
Pak histori: Alabarda
është armë e bardhë, e klasifikuar si lloj sëpate me një teh e një majë të mprehtë,
montuar mbi një shtizë të gjatë. U përdor së pari në Kinë, që në mugëtirën e kohëve.
Në Evropë hyri rreth viteve 1300, përmes gjermanëve e skandinavëve. Mund ta mbytë
njeriun duke e prerë, ose duke e shporuar. Kuptohet: sot është thjeshtë simbol,
ngjyrim kohor, që plotëson artistikisht veshjen, që mendohet të jetë ideuar nga Mikelanxhelo,
me të cilën Rojet Zvicerane u paraqiten e u shërbejnë, gjithnjë me buzë në gaz, shtegtarëve,
që prej më se pesëqind vjetësh.