(03.05.2010 RV)U kremtua sot Dita XVIII Botërore e lirisë së shtypit. Këtë
vit, OKB-ja ka përcaktuar si temë: “Liria e informacionit: e drejta për të ditur”.
Objektivi kryesor është të kujtohen parimet themelore, nga të cilat rrjedh e drejta
e informacionit, duke u bërë homazhe edhe të gjithë gazetarëve, që kanë humbur jetën
në krye të detyrës. Sipas të dhënave të UNESCO-s, gjatë vitit 2009 janë vrarë 77 gazetarë
në botë. Në një studim të botuar nga “Freedom House”, regjistrohen përparime në Azinë
jugore, por tensione në Amerikën Latine e kundërshti në Afrikën sub-sahariane. Cila
është sot, gjendja e lirisë së shtypit në botë? Të dëgjojmë konstitucionalistin italian,
Enxo Balboni, pedagog në Universitetin Katolik: Liria e shtypit,
ose më mirë liria e mendimit, duhet parë gjithnjë në dy aspekte: nga njëra anë, liria
për të informuar – e këtu hyn liria e gazetarëve dhe e editorëve – dhe nga ana tjetër,
liria për të qenë të informuar, që është e drejtë tipike e përdoruesve të informacionit
dhe është themelore për demokracinë. Në këtë moment, ka shqetësime si për shëndetin
ekonomik të ndërmarrjeve gazetareske – e këtyre duhet që qeveritë e parlamentet t’u
japin ndonjë ndihmë a mbështetje – ashtu edhe për ngushtimin e lirisë së gazetarëve
dhe të veprimtarëve të informacionit. E këtu duhet gjetur një ekuilibër ndërmjet së
drejtës për të informuar dhe asaj për të mos e ekzagjeruar në disa gjëra, që shkojnë
përtej lirisë së informacionit. Në përgjithësi, mund të themi se mungesa e
lirisë së shtypit ndikon mbi të gjitha liritë themelore, apo jo? Sigurisht!
Kjo është njëra nga liritë e para politike, pasi formimi i një opinioni publik të
ndërgjegjshëm, pra shtylla e vetë demokracisë, mbahet vetëm nëse qarkullon informacioni.
Në të gjitha regjimet që dhunojnë lirinë – totalitarë apo plebishitarë – gjëja e parë
që bëhet është prerja e krahëve të lirisë së informacionit. Shtimi dhe përhapja
e mjeteve të komunikimit masiv, sipas jush, ka ndikuar pozitivisht, apo negativisht
mbi këtë të drejtë? Kam përshtypjen se ka kontribuar pozitivisht aty ku kjo
ishte e vetmja mënyrë: në rastin e regjimeve totalitare e jo demokratike, nëse nuk
do të ishin mjetet e reja të formimit të opinionit publik, gjithçka do të kalonte
në heshtje. Tani është më e vështirë për një diktator.