Papa në Shtëpinë e vogël të Provanisë Hyjnore-Kotolengo: “Të varfërit janë Jezusi”.
(02.04.2010 RV)Pas nderimit të Sindonës, Benedikti XVI vizitoi Shtëpinë e vogël
të Provanisë Hyjnore, ku u prit nga eprorët e përgjithshëm të tri Kongregatave kotolenge:
atë Aldo Saroto, vëlla Gjuzepe Menegini e Nënë Gjovana Masé. Benedikti XVI hyri menjëherë
në Kishën e Institutit, ku nderoi reliket e Shën Gjuzepe Benedeto Kotolengos (1786-1842)
dhe u ndalua në adhurim para të Shenjtnueshmit Sakrament. Pasi ndoqi përshëndetjen
e atë Sarotos, Ati i Shenjtë u drejtoi të pranishëmve një fjalim, në të cilin vuri
në dukje posaçërisht figurën e themeluesit, Shën Gjuzepe Benedikt Kotolengos, të cilin
e kujtoi edhe në audiencën e përgjithshme të së mërkurës së kaluar, së bashku me Shën
Leonardin Murialdo. Ai ishte kampion i vërtetë i bamirësisë – nënvizoi Papa -
që ia kushtoi gjithë veprimtarinë e vet më të varfërve, në përpjekjen për të shëruar
plagën e rëndë të varfërisë, nga e cila vuante Torino e kohës. Për t’i dhënë një
përgjigje konkrete kësaj situate, nisi të mikpresë njerëz, që nuk i donte askush,
që shoqëria i kishte flakur pa pikë dhëmbshurie nga radhët e saj. Bërthama e parë
e Shtëpisë së Provanisë Hyjnore nuk u ngrit lehtë e pati jetë të shkurtër – kujtoi
Benedikti XVI - duke përmbledhur shkurtimisht historikun e vendit, që po vizitonte
e duke shpjeguar se në vijim, në lagjen e Valdokos, pa dritën struktura e re, për
ndërtimin e së cilës ndihmuan disa familje rregulltare. Kotolengo - nënvizoi me
kënaqësi Benedikti XVI – ndonëse kaloi çaste dramatike, i jetoi gjithnjë ngjarjet
e kohës me besim e shpresë, duke parë në secilën prej tyre, praninë, mëshirën e madhështinë
e Zotit që, më shumë se kudo, pasqyrohet pikërisht në fytyrat e të varfërve sepse,
siç thoshte me bindje Shenjti, ata janë Jezusi! Shën Gjuzepe i shërbeu gjithë jetën
Zotit e njeriut, i vënë në lëvizje nga fjala e Shën Palit Apostull: “Dashuria e Krishtit
s’na lë të qetë!”. U përpoq, kështu, t’ia njihte të gjithëve, edhe më të papërfillurve,
dinjitetin njerëzor, duke e kuptuar se ai që vuan, që mohohet, që përjashtohet, që
nuk duhet, mbyllet në vetvete, izolohet, humbet besimin në gjithçka, edhe në vetë
jetën. Prandaj u përpoq të krijonte afërsi me të vuajturit, të jetonte pranë tyre
e me ta, ashtu si jetohet në gjirin e familjes, stil që vijon edhe sot në shtëpitë
e ngritura prej tij. Ati i Shenjtë përshëndeti edhe të sëmurët, duke i ftuar t’i
jetojnë vuajtjet e tyre në bashkim me vuajtjet e Krishtit të vdekur e të ringjallur,
për shëlbimin e botës e duke e konsideruar veten si gurë të çmuar në mozaikun e mrekullueshëm
të artistit më të madh, Zotit. “Krishti – vijoi të kujtonte Papa - vdiq
në kryq, që të na shëlbojë, që jeta të lulëzojë me gjithë shkëlqimin e saj. Kjo shtëpi,
një nga frytet e pjekura, të lindura nga Kryqi e nga Ringjallja e Krishtit, dëshmon
edhe një herë se fjalën e fundit nuk do ta thonë kurrë vdekja, as vuajtja. Fjalën
e fundit do ta thotë gjithnjë jeta! Kjo na ndihmon të kuptojmë një të vërtetë të madhe,
që është edhe mesazhi i këtij ekspozimi solemn të Sindonës: 'Passio Christi- Passio
hominis'!". T’i lutemi, prandaj, Zotit të kryqëzuar, ta ndriçojë jetën
tonë e të mbarë njerëzimit: të sotmen e të ardhmen, dhimbjen e gëzimin, mundimin e
shpresat! Në përfundim Papa u takua me disa të sëmurë, që përfaqësonin të gjithë
banorët e Shtëpisë së Vogël. Nga Kotolengo Benedikti XVI u nis drejt aeroportit
Torino-Kazele, ku u përshëndet me autoritetet, që e prisnin, dhe u nis për në aeroportin
Romë-Çampino.