Ministri i Jashtëm italian,Frattini, e ardhja e Kosovës në BE
(29.4.2010RV)"E ardhmja e Kosovës është në Bashkimin Europian", u shpreh ministri
i Jashtëm italian, Franco Frattini, në fjalën e tij dje pasdite në Kuvendin e Kosovës
në Prishtinë. Duke vënë në dukje se Italia është një ndër shtetet që njohu
menjëherë pavarësinë e Kosovës, Frattini tha se "pavarësia e Kosovës është e pakthyeshme".
Ai garantoi se Italia mbështet zhvillimet lokale dhe qendrore në Kosovë, ndërsa
kërkoi nga autoritet të plotësojnë rekomandimet e Brukselit. Frattini u ndal
tek tregtia dhe ekonomia, ndër sektorët ku Kosova mund të zhvillojë një perspektivë
europiane. "Italia mendon se duhet të bëhet çdo përpjekje nga ana e Prishtinës, në
mënyrë që të nëshkruhen marrëveshje të tregtisë midis BE dhe Kosovës", tha mes të
tjerave Frattini. Sipas tij, edhe BE duhet të kontribuojë në krijimin
e kushteve më të mira për Kosovën, në mënyrë që ajo të arrijë zhvillimin. "Një hap
tjetër për të ecur drejt perspektivës europiane të Ballkanit, në këtë rast dhe Kosovës
është që të sigurohemi që ky rajon mbetet me prioritet në axhendën e BE", tha më tej
Frattini. Duke folur mbi Konferencën e Sarajevës që do të mbahet në qershor,
Frattini tha se "të gjitha vendet e rajonit dhe ne radhë të parë Beogradi dhe Prishtina
janë ato që duhet të marrin pjesë dhe të tregojnë qëndrimin e tyre fleksibël dhe të
drejtë". Sipas Frattinit, "kjo konferencë do të shënojë një test të rëndësishëm për
pjekurinë europiane dhe bashkëpunim rajonal, test që ne presim ta kalojmë me sukses
dhe me pozitivizëm". Ai ripërsëriti ftesën e bërë në Beograd për dialog të
frytshëm midis Kosovës dhe Sërbisë. "Duhet të bëjmë dhe zhvillojmë çdo përpjekje,
në mënyrë që të mbështesim pajtimet rajonale të shteteve, sepse Prishtina dhe Beogradi
duhet të gjejnë një mënyrë për një komunikim konstruktiv", theksoi Frattini.
Po kështu, sipas tij, është e rëndësishme që situata të përmirësohet në veri të Kosovës,
ndaj duhet gjetur zgjidhje pragmatike, "në mënyrë që t'u qasemi problemeve konkrete
siç janë administrata, apo administrimi i gjyqësorit dhe funskionalizimi i doganës".
Frattini tha se "Italia gjendet në vijën e parë të frontit sa i përket ngritjes
së kapaciteteve institucionale dhe konsolidimit ndërkombëtar të shtetit të pavarur
të Kosovës. Përkushtimi ynë në misione ndërkombëtare në Kosovë do të jetë i madh në
aspektin sasior dhe cilësor". Ministri italian i Jashtëm u ndal dhe në mbrojtjen
e trashëgimisë kulturore dhe etnike në Kosovë, duke u shprehur se "Italia bën përpjekje
në mbrojtje e trashëgimisë kulturore dhe religjioze këtu". "Italia do të inkuarajojë
palët e përfshira dhe do të sigurojë që këto trashëgimi me vlerë që janë si pishtarë
të pajtimit dhe dialogut, të mos jenë asnjëherë simbole të ndarjes dhe konfrontimit,
duke marrë gjithmonë parasysh dallimet legjitime të diversitetit fetar e kulturor
këtu", nënvizoi ai. "Ne jemi të vetëdijshëm që zhvillimi i sigurisë në Kosovë
dhe Ballkan varet edhe nga mbrojtja e identitetit dhe bashkëjetesës multi-etnike dhe
respektimit të të drejtave themelore të të gjithëve, përfshirë këtu edhe të drejtën
për liritë fetare", tha Frattini në fjalën e mbajtur sot pasdite në Kuvendin e Kosovës.
( nga ATSH-ja)