“Vox Clara” என்ற கமிட்டியின் உறுப்பினர்கள் மற்றும் ஆலோசகர்களுடன் இப்புதனன்று மதிய உணவை அருந்தினார் திருத்தந்தை

ஏப்ரல்28,2010 “Vox Clara” என்ற கமிட்டியின் உறுப்பினர்கள் மற்றும் ஆலோசகர்களுடன் இப்புதனன்று மதிய உணவை அருந்தினார் திருத்தந்தை 16ம் பெனடிக்ட்.

ஐந்து கண்டங்களின் பிரதிநிதிகளைக் கொண்ட வோக்ஸ் கிளாரா என்ற கமிட்டியானது, ரோமன் ரீதியில் ஆங்கிலத் திருப்பலி புத்தகத்தின் மொழிபெயர்ப்புக்குப் பொறுப்பானதாகும். இது திருப்பீட திருவழிபாட்டு பேராயத்தோடு தொடர்புடையதாகும்.

இந்த மதிய உணவின் போது அக்குழுவிடம் பேசிய திருத்தந்தை, திருவழிபாட்டு நூல்களின் ஆங்கில மொழிபெயர்ப்புக்கு இந்த அமைப்பு கடந்த எட்டு ஆண்டுகளுக்கு மேலாகத் திருப்பீட திருவழிபாட்டு பேராயத்திற்குக் செய்து வரும் உதவிகளுக்கு நன்றி தெரிவித்தார்.

ரோமன் திருப்பலி புத்தகத்தின் ஆங்கில மொழிப் பதிப்பு, விரைவில் வெளியிடப்படவிருப்பதைத் தான் வரவேற்பதாக உரைத்த திருத்தந்தை, இந்தக் குழு கஷ்டப்பட்டு உழைத்ததன் பயனாக வெளிவரவிருக்கின்ற இப்புத்தகம் ஆங்கிலம் பேசும் உலகில் பயன்படுத்தப்பட உதவியாக இருக்கும் என்றும் கூறினார்.

ஏறத்தாழ நாற்பது ஆண்டுகளாகப் பயன்படுத்தி வந்த பழைய புத்தகத்தை விடுத்து புதிய புத்தகத்தைப் பயன்படுத்துவதற்குப் பலருக்குச் சிரமம் இருக்கலாம், இந்த மாற்றம் ஆங்கிலம் பேசும் உலகில் திருநற்கருணைப் பக்தியில் புதுப்பித்தலை ஏற்படுத்தி அதனை ஆழப்படுத்த உதவும் என்ற தனது நம்பிக்கையைத் தெரிவித்தார் திருத்தந்தை