Sot Kisha katolike përkujtoi Shën Pjetrin Shanel, meshtar e martir.
(28.04.2010 RV)Autuna është një "shprehje e vogël gjeografike", një ishull
i vogël, i cili shënohet në Atlas me një pikëz. Vendosur ndërmjet Ekuadorit e tropikut
të Bririt të Cjapit, në Oqeanin pakufishëmn Paqësor, një copëz e ishujve Figi, është
cak i këndshëm për turistët, të cilëve u pëlqejnë vendet ekzotike. Me një popullsi
krejtësisht katolike, sot jeton në paqe. Por njëqind vjet më parë e pikërisht më 12
nëntor 1837, kur këtu zbarkoi shëndosh e mirë misionari marist Pjeter Shanel, i shoqëruar
nga një vëlla shekullar, ishulli, i ndarë në dy pjesë nga një vargmal, që i kalon
përmes, e në dy fise, në luftë të përhershme njëri me tjetrin, nuk ishte fare një
vend i këndshëm turistik. Vetëm guximi e dashuria e krishterë e një njeriu të
Zotit mund ta zgjidhte këtë vend si cak për misionin e vet, pa marrë parasysh rreziqet
që e kërcënonin. E pikërisht këtu Pjetër Shanel do ta përfundonte aventurën e tij
prej ugjillëzuesi, i goditur me kopaçe e sopatë, më 28 prill 1841 nga dhëndrri i kryetarit
të fisit, Musumusu, i cili qe zemruar, sepse ndërmjet atyre që qenë kthyer në fenë
e Krishtit ishin disa nga pjesëtarët e familjes së tij. Pjetër Shanel pati lindur
në Francë, në Kyet, më 12 korrik 1803. Hyri që i ri në seminar dhe shumë shpejt u
shugurua meshtar. Deshi të shkonte menjëherë në mision, por nuk mundi ta realizonte
dëshirën, sepse ipeshkvi i tij kishte nevojë për meshtarë. U lidh me rregulltarët
maristë, të cilët realizonin idealin misionar ndër famullitë ku punonin. Sapo iu
krijuan mundësitë, u nis menjëherë për në Oqeani, ku gjeti një mjedis krejt të ndryshëm,
nga ai që kishte lënë. Megjithatë, me këmbënguljen e tij, Ungjilli nisi të rrënjosej
në shpirtin e të rinjve. Iu desh ta paguante këtë me gjak. Kur ia kishte arritur të
ungjillëzonte thuajse të gjithë ishullin, pleqtë fanatikë e martirizuan. Martiri i
krishterë, i lumnuar më 17 nëntor 1889, u shkrua në radhët e shenjtorëve më 12 qershor
1954, për t'u shpallur menjëherë edhe Pajtor i Oqeanisë.