(28.04.2010 RV)Brenda javës që vjen, Gjermania do të ketë gati projektligjin
që do t’i mundësojë Berlinit të japë kuotën e vet me ndihma për Greqinë. Lajmin e
dha një zëdhënës i Ministrisë së Financave. Qeveria gjermane ka nevojë për miratimin
e parlamentit për të dhënë 8,4 miliard euro, pjesë e 30 miliardëve të Bashkimit Evropian,
të cilave u shtohen edhe 15 miliardët e Fondit Monetar Ndërkombëtar. Athinës do t’i
kërkohen të ulë shpenzimet. Ambientet ekonomike e financiare pësuan një tërmet
të fortë, pasi dje, agjensia financiare Standart & Poor’s e deklasoi ekonominë greke
dhe uli nivelin e “rating” (besueshmërisë) për Greqinë. Titujt e saj shtetërorë konsiderohen
faktikisht “plehra”. Vendim i njëjtë për Portugalinë. Mbledhja e jashtëzakonshme evropiane
për Greqinë do të mbahet më 10 maj e do t’i sigurojë Athinës fondet për të paguar
brenda 19 majit, 8,5 miliard euro. Bursat evropiane në rënie.