Pesëvjetori i audiencës së parë të përgjithshme të Benediktit XVI: në zgjedhjen e
emrit si Pasardhës i Shën Pjetrit, dëshira për paqe.
(27.04.2010 RV)Nesër, si çdo të mërkurë, në sheshin e Shën Pjetrit në Vatikan,
do të mbahet audienca e përgjithshme e Papës. Po nesër bie përvjetori i vizitës së
Benediktit XVI në popullsitë e dëmtuara nga tërmeti në Abruco të Italisë. Ndërsa si
sot, pesë vjet më parë, më 27 prill 2005, Ati i Shenjtë mbajti audiencën e tij të
parë, gjatë së cilës shpjegoi pse zgjodhi emrin Benedikt, si Shenjti i Norçës, Pajtor
i Evropës dhe si Papa që udhëhoqi Kishën gjatë Luftës I Botërore. Pikërisht për këtë
të fundit, Papa Racinger pati thënë: “Ishte profet i guximshëm dhe i vërtetë
i paqes dhe punoi me guxim të jashtëzakonshëm fillimisht për të shmangur dramën e
luftës e pastaj për të kufizuar pasojat e saj. Në gjurmët e tij dëshiroj të shërbej
për pajtimin e harmoninë ndërmjet njerëzve dhe popujve, thellësisht i bindur se pasuria
e madhe e paqes është para së gjithash dhuratë e Zotit, dhuratë e brishtë dhe e çmuar
për të cilën duhet të lutemi, të kujdesemi e të përpiqemi ditë për ditë me ndihmën
e të gjithëve”. Por emri Benedikt të kujton menjëherë edhe “Patriarkun e monakizmit
perëndimor”. Papa shpjegoi se shën Benedikti nga Norça nderohet shumë në Bavierë,
në vendlindjen e Jozef Racinger. Ai përbën një pikë themelore referimi për bashkimin
e Evropës dhe për rrënjët e saj të krishtera: “Në fillim të shërbimit tim si
Pasardhës i Shën Pjetrit i lutem shën Benediktit të na ndihmojë ta mbajmë gjithnjë
Krishtin në qendër të jetës sonë. Ai qoftë gjithmonë në vendin e parë në mendimet
e në çdo aktivitet tjetër tonin!”