Pritet vizita e Papës në Torino, ku është ekspozuar Sindona: të krishterët të kundrojnë
misterin e Fytyrës së Krishtit!
Besimtarët e Torinos presin, me entuziazëm të madh, vizitën e Papës, të dielën e
ardhshme, me rastin e ekspozimit të Sindonës së Shenjtë. Një ngjarje e jashtëzakonshme
që, duke nisur nga 10 prilli, po tërheq çdo ditë në kryeqendrën piemonteze, dhjetra
mijëra shtegtarë nga mbarë bota. Në lutjen e Mbretëreshës Qiellore, më 1 prillin e
kaluar, Papa kujtoi se një ditë më parë, në Torino, kishte filluar ekspozimi solemn
i Sindonës, pëlhurës së shenjtë, me të cilën besohet se qe mbështjellë Krishti, para
se të varrosej. Benedikti XVI do të jetë shtegtar ndërmjet shtegtarëve, për të
kundruar misterin e fytyrës së Krishtit. Kanë kaluar dy vjet nga 2 qershori 2008 kur,
në audiencën me 7 mijë besimtarë të dioqezës së Torinos, të shoqëruar nga bariu i
tyre, kardinali Severino Poleto, Benedikti XVI dha njoftimin për ekspozimin e Sindonës:
“Në këtë kontekst, kam kënaqësinë t’i përgjigjem pritjes suaj të madhe e
të pranoj dëshirën e Kryeipeshkvit tuaj, duke lejuar që në pranverën e 2010-tës të
bëhet një ekspozim tjetër i Sindonës. Në se Zoti do të më japë jetë e shëndet, shpresoj
të vij edhe unë – tha Papa dhe në vijim theksoi: - Do të jetë
një rast shumë i përshtatshëm – jam i sigurtë – për të kundruar këtë Fytyrë misterioze,
që heshturazi i flet zemrës së njerëzve, duke i ftuar të njohin Fytyrën e Hyjit i
cili ‘e deshi aq shumë botën, sa të jepte Birin e tij të vetëm, që kushdo beson në
të, të mos vdesë, por të ketë jetën e pasosur”. Fytyra e Zotit është caku
i atij, që ecën me besnikëri në udhën e dashurisë. Kush më ka parë mua, ka parë Atin
– pohon Krishti. Prandaj në se duam të shohim Hyjin – na kujton Papa - duhet të pranojmë
Krishtin e të formohemi nga shpirti i tij: “Uroj që ky akt nderimi t’i ndihmojë
të gjithë për të kërkuar fytyrën e Hyjit, të cilën e kërkuan me aq zjarr Apostujt,
ashtu si e kërkojmë edhe ne” (Mbretëresha Qiellore – 11 prill 2010). Kërkimi
i fytyrës së Krishtit ishte zemra e një shtegtimi tjetër baritor të Benediktit XVI,
atij në Shenjtëroren abruceze të Manopelos, në fillim të papnisë së tij, më 1 shtator
të vitit 2006: “Së bashku përpiqemi ta njohim gjithnjë më mirë fytyrën e
Zotit e nga fytyra e Zotit marrim atë forcë dashurie e paqeje, që na tregon edhe rrugën
e jetës sonë”. Duke kundruar ikonën e Fytyrës së Shenjtë, që ruhet në Manopelo
- nënvizoi Papa - kuptojmë se për të njohur fytyrën e Zotit në atë të vëllezërve,
është e nevojshme të kemi duar të pafajshme e zemër të pastër: “Fytyrën tënde,
o Zot, kërkoj: të gjithë të krishterët duhet ta kërkojnë me etje fytyrën e Jezusit;
jemi ne, breznia, që kërkon sot fytyrën e Tij, fytyrën e Hyjit të Jakobit. Në se
ngulmojmë në kërkimin e fytyrës së Zotit, në fund të shtegtimit tonë tokësor do të
jetë Ai, Jezusi, galdimi ynë i amshuar, shpërblimi e lavdia jonë, përgjithmonë e jetës”.