Papa pranon dorëheqjen e kryeipeshkvit të Bryzh, për shkak të shpërdorimit të një
të mituri.
(23.04.2010 RV)Benedikti XVI pranoi dorëheqjen nga qeverisja baritore e dioqezës
belge të Bruges, paraqitur nga imzot Rozhe Zhozef Vangeluve, për shkak të shpërdorimit
seksual mbi një të mitur. Për këtë ngjarje, ndodhur në të kaluarën, sot paradite Konferenca
ipeshkvnore belge mbajti një konferencë shtypi, kushtuar pikërisht dorëheqjes së prelatit.
“Jam thellësisht i hidhëruar për atë që kam bërë e i kërkoj sinqerisht të
falur viktimës, familjes, bashkësisë katolike e mbarë shoqërisë”: këtë pohoi imzot
Vangeluve, duke folur për dorëheqjen e tij si ipeshkëv i Bryzh. Prelati, përmes një
note, deklaroi se, kur ishte ende meshtar i thjeshtë si dhe në fillimet e ipeshkvnisë,
shpërdoroi seksualisht një të ri. Viktima – shkruan - vuan akoma, për shkak të këtij
shpërdorimi. Prelati pohoi se vitet e fundit e ka pranuar disa herë gabimin, duke
i kërkuar ndjesë viktimës e familjes së tij.Nga ana e tij, kryipeshkvi i Malin-Bruksel,
imzot André-Zhozef Lèonard, iu drejtua kryesisht viktimës e familjes. Për viktimën
– tha Primati i Belgjikës – duhet kujtuar kalvari i pafundmë, që sigurisht vijon ende.
Dorëheqja e imzot Vangeluve- pohoi - që përkon me vullnetin për transparencë të Kishës
belge, ishte e nevojshme, për shkak të respektit ndaj viktimës, familjes së tij e,
sidomos, ndaj së vërtetës. Në këtë fushë - theksoi - Kisha përsërit se nuk ka më kurrfarë
dredhimi e se dëshiron ta ndërrojë faqen e shkruar në një periudhë jo të largët, në
të cilën parapëlqehej më shumë heshtja e fshehja e shpërdorimeve të tilla. Kjo ngjarje
– vijoi - natyrisht është tejet e dhimbshme për mbarë bashkësinë katolike belge.
Gjithsesi, kryeipeshkvi Léonard uroi që ipeshkvijtë dhe meshtarët e vendit të mos
shikohen shtrembër si të tillë, duke pasur mirë parasysh se shumica e tyre jeton në
përkim të plotë me thirrjen meshtarake.