Papa ambasadorit të ri të Maqedonisë: merrni nga trashëgimia e krishterë për të sjellë
në Evropë vlerat e drejtësisë e të dialogut
(22.04.2010 RV)Sot paradite, paraqiti letrat kredenciale në Vatikan, ambasadori
i ri i ish-Republikës Jugosllave të Maqedonisë, Gjoko Gjorgjevski, i cili u prit në
audiencë nga Papa Benedikti XVI. Maqedonia aspiron të bëjë pjesë në Bashkimin Evropian,
theksoi Ati i Shenjtë, e hapat e bëra në këtë drejtim janë të mëdha, por për të ndërtuar
të ardhmen duhet të mos harrohet historia, kultura e shpirti i popullit, në mënyrë
që risitë të mos vuajnë nga plagë shoqërore të vjetra, të cilat s’janë mbyllur kurrë.
Gjithashtu, vazhdoi Papa, interesat globale nuk duhet të lenë mënjanë ato lokale e
zëri i relativizmit nuk duhet ta verë në gjumë ndërgjegjen. Benedikti XVI i kujtoi
ambasadorit maqedonas se vendi ruan shenja të dukshme të vlerave njerëzore e të krishtera: “Duke
marrë nga kjo trashëgimi, qytetarët e vendit tuaj do të vazhdojnë të ndërtojnë edhe
në të ardhmen historinë e tyre e, të mbështetur nga identiteti i tyre shpirtëror,
mund të sjellin në gjirin e popujve evropianë kontributin e përvojës së tyre. Për
këtë, uroj me gjithë zemër të realizohen aspiratat dhe përpjekjet në rritje të këtij
vendi për t’u bërë pjesë e Evropës së Bashkuar, në kushtet e pranimit të detyrave
e të të drejtave e të respektimit të anasjelltë të instancave kolektive e të vlerave
tradicionale të çdo populli”. Në Maqedoni, vazhdoi Papa, njerëzit e kuptojnë
se janë vëllezër, bij të të njëjtit Zot e qytetarë të të njëjtit vend. Gjithsesi,
dialogu e paqja nuk mund të varen vetëm nga strategji politike, apo planifikime njerëzore,
pasi paqja është dhuratë e Zotit për njerëzit vullnetmirë: “Drejtësia dhe falja
përfaqësojnë shtyllat bazë të kësaj paqeje. Drejtësia siguron respektin e plotë të
të drejtave dhe të detyrave, ndërsa falja shëron e rindërton themelet e marrëdhënieve
ndërmjet njerëzve, që akoma ndjejnë pasojat e ndeshjes ndërmjet ideologjive të së
kaluarës së afërm”. E duke kaluar nga historia në gjendjen aktuale më globale,
Benedikti XVI theksoi: “Një zhvillim shoqëror dhe ekonomik i qëndrueshëm nuk
mund të mos marrë parasysh kërkesat kulturore, shoqërore e shpirtërore të njerëzve,
si edhe të vlerësojë traditat e burimet popullore më fisnike. E kjo, me vetëdijen
se fenomeni në rritje i globalizimit, i cili, nga njëra anë, sjell nivelimin e ndryshimeve
shoqërore dhe ekonomike, nga ana tjetër, mund ta rëndojë çekuilibrin ndërmjet atyre
që përfitojnë nga mundësitë gjithnjë e më të mëdha për t’u pasuruar dhe atyre që lihen
jashtë progresit”. Në fillim të fjalës së tij, Papa vuri në dukje marrëdhëniet
e përzemërta që ekzistojnë ndërmjet vendit ballkanik dhe Selisë së Shenjtë, gjë që
dëshmohet nga ndërtimi i kishave në të gjithë vendin, megjithëse katolikët janë pakicë.
Duke u bazuar në këtë trashëgimi të përbashkët shpirtërore dhe kulturore, Benedikti
XVI përfundoi me urimin që Maqedonia të mos shkojë pas relativizmit moral dhe mosinteresimit
për fenë, që mbretërojnë sot, por të dijë të zgjedhë me mençuri horizontet e reja
të qytetërimit dhe të humanizmit të vërtetë: “Për ta bërë këtë, duhet të mbani
gjallë e fort, në nivel personal e komunitar, ato parime, të cilat qëndrojnë edhe
në bazën e qytetërimit të këtij populli: rëndësia e familjes, mbrojtja e jetës njerëzore,
nxitja e përvojës fetare, sidomos tek të rinjtë”.