മാര്പാപ്പയുടെ വേനല്ക്കാലപരിപാടിയില് മൂന്ന് അന്തര്ദേശീയ സന്ദര്ശനങ്ങള്
ബനഡിക്ട് 16-ാമന് മാര്പാപ്പയുടെ വേനല്ക്കാല പരിപാടിയില് മൂന്ന് അന്തര്ദേശിയ അപ്പസ്തോലിക
സന്ദര്ശനങ്ങള്. 2010 മെയ്മാസം മുതല് സെപ്തംമ്പര് മാസംവരെ നീളുന്നതാണ് മാര്പാപ്പായുടെ
വേനല്ക്കാല പരിപാടി. മെയ് മാസത്തെ ആദ്യ പരിപാടി 2-ാം തിയതിയിലുള്ള ട്യൂറിനിലെ തിരുക്കച്ചയുടെ
ബസിലിക്കാ സന്ദര്ശനമാണ്. രാവിലെ അവിടെ സമൂഹബലിയര്പ്പിക്കുന്ന പാപ്പാ, യുവജനങ്ങളുമായി
കൂടിക്കാഴ്ച നടത്തുകയും, വൈകുന്നേരം അവിടത്തെ ആശുപത്രിയില് രോഗകളെ സന്ദര്ശിക്കുയും
ചെയ്യും. വൈകുന്നേരം 6-ന് യേശുവിന്റെ മൃതശരീരം പൊതിഞ്ഞതെന്ന് വിശ്വസിക്കുന്ന തിരുക്കച്ച
വണങ്ങുന്ന മാര്പാപ്പ അന്നുതന്നെ വത്തിക്കാനിലേയ്ക്കു മടങ്ങും. മെയ് 11-ന് തുടങ്ങി
14-ന് അവസാനിക്കുന്ന മാര്പാപ്പയുടെ 15-ാമത്തെ അന്തര്ദേശീയ അപ്പസ്തോലിക പര്യടനം
പോര്ച്ചുഗലിലേയ്ക്കാണ്. ഫാത്തിമാ നാഥയുടെ തീര്ത്ഥാടന കേന്ദ്രത്തില് ദിവ്യബലിയര്പ്പിക്കുന്ന
മാര്പാപ്പാ പോര്ച്ചുഗലിലെ മറ്റു പ്രധാനകേന്ദ്രങ്ങളും സന്ദര്ശിക്കും. ജൂണ് മാസം
3-ാം തിയതി മാര്പാപ്പ തന്റെ 16-ാമത്തെ അന്തര്ദേശീയ അപ്പസ്തോലിക പര്യടനം സൈപ്രസ്സിലേയ്ക്കു
നടത്തും. സൈപ്രസ്സിന്റെ മണ്ണില് കാലുകുത്തുന്ന ആധുനികയുഗത്തിലെ പ്രഥമ പത്രോസിന്റെ
പിന്ഗാമിയായിരിക്കും ബനഡിക്ട് 16-ാമന് മാര്പാപ്പ. ജൂണ് 6-വരെ നീളുന്നതാണീ സന്ദര്ശനം. ജൂലൈ
4-ന് മാര്പാപ്പ ഇറ്റലിയിലെ സല്മോണായിലേയ്ക്ക് ഒരിടയ സന്ദര്ശനം നടത്തും. വിശുദ്ധ സെലെസ്റ്റിന്
അഞ്ചാമന് മാര്പാപ്പയുടെ 800-ാം ജന്മവാര്ഷീകാഘോഷ പരിപാടിയോടനുബന്ധിച്ചാണ് ഈ യാത്ര. സെപ്തംബര്
5-ാം തിയതി ലിയോ പതിമൂന്നാമന് മാര്പാപ്പയുടെ 2-ാം ജന്മശതാബ്ദി ആഘോഷങ്ങള്ക്കായി
ഇറ്റലിയിലെ കര്പ്പിനേത്തോ റൊമാനോയിലേയ്ക്കും പാപ്പ ഇടയസന്ദര്ശനം നടത്തുന്നുണ്ട്. ഈ
വേനല്ക്കാലത്തെ അവസാന പരിപാടി, സെപ്തംമ്പര് മാസത്തില് 16 മുതല് 19-വരെ നീണ്ടുനില്ക്കുന്ന
മാര്പാപ്പയുടെ ഇംഗ്ളണ്ടിലേയ്ക്കുള്ള അന്തര്ദേശിയ അപ്പസ്തോലിക സന്ദര്ശനമായിരിക്കും.