1200 universitarë të Romës i dërgojnë Papës një letër, përmes së cilës i shprehin afërsinë dhe dashurinë e tyre.

(21.04.2010 RV)Një letër, shkruar nga universitarët, për t’i shprehur Benediktit XVI dashurinë dhe afërsinë e tyre. Dokumenti iu dorëzua Papës sot, gjatë audiencës së përgjithshme. Shkruar me rastin e pesë vjetorit të zgjedhjes së Benediktit XVI në fronin e Shën Pjetrit, firmoset nga 1200 të rinj të universiteteve shtetërore, private e katolike të kryeqytetit italian, si dhe nga përfaqësues të veprimtarisë baritore universitare.
“Atë i Shenjtë, ju na keni besuar një detyrë, që të magjeps, por edhe të mbush me shqetësim: të jemi veprimtarë të dashurisë intelektuale! Me ju mësuam se studimi është shërbim, është rrugë për të promovuar e për të ndërtuar qytetërimin e dashurisë”. Kjo është zemra e mesazhit, plot ngrohtësi e urime, që 1200 universitarët e Romës ia dorëzuan sot Papës Benedikti XVI. Por, si lindi kjo nismë? Përgjigjet, në mikrofonin tonë, imzot Lorenco Leuci, drejtor i zyrës për baritorinë universitare të dioqezës:

“Të rinjtë universitarë të Romës deshën t’i shprehnin Atit të Shenjtë mirënjohjen dhe dashurinë që kanë për të, për mësimet e tij, sepse në këto pesë vjet, të rinjtë e kanë provuar sa të rëndësishme janë perspektivat e tij teologjike e shpirtërore, të domosdoshme për të përgatitur të rinj besimtarë, të aftë për të dhënë, më pas, dëshminë se Ungjilli mund ta orientojë jetën shoqërore e kulturore të kohës sonë. Letra shpreh lidhjen, gjithnjë më të fortë, ndërmjet të rinjve universitarë e Papës, i cili u kërkon ta jetojnë studimin si çast shërbimi, si për vete, ashtu edhe për të tjerët, kur të fillojnë veprimtarinë e tyre profesionale”.

Por, ç’i shtyu të rinjtë ta shkruajnë këtë letër? Përgjigjet Antonela Mankuzo, një nga nënshkrueset:

“Mbi të gjitha, për t’i dëshmuar dashurinë tonë e mbështetjen tonë Papës së madh , që ka bërë aq shumë për Kishën e edhe për ne, të rinjtë, me fjalë e me vepra. Benedikti XVI për ne është simbol i vendosmërisë e i dashurisë. Besoj se Kisha, në këto çaste, ka nevojë për një figurë të fuqishme, të vendosur, si Papa Racinger, që të përballojë këto kohë të vëshira, që po kalojmë”.