Në të gjithë botën katolike u kremtua sot Dita e lutjes për Papën. Shqiptarët e urojnë:“Për
shumë vjet!”
(19.04.20010 RV)“Të falënderojmë Zotin për shërbimin mendjendritur dhe dëshminë
të pastër, kristaline, të Papës”: kështu Konferenca ipeshkvnore italiane i fton besimtarët
të luten për Benediktin XVI sot, 19 prill, në pesëvjetorin e zgjedhjes së tij në fronin
papnor. Në qytetet e mëdha, ashtu si edhe në fshatrat më të vogla, mijëra njerëz u
mblodhën në katedralet madhështore e në shenjtëroret, për t’u lutur, duke marrë pjesë
në kremtime eukaristike, liturgji të Fjalës, mbrëmësore e adhurim të të Shenjtnueshmit
Sakrament. E edhe në Shqipëri vijuan kremtimet, lutjet dhe urimet për Papën, në
pesëvjetorin e papnisë. Dje kardinali Zenon Groholevski, Prefekt i Kongregatës
për Edukimin Katolik, në Shqipëri për kremtimet e 150-vjetorit të themelimit të Seminarit
Papnor të Shkodrës, kryesoi Meshën Shenjte në Katedralen e Shën Palit në Tiranë,
me rastin e 5-vjetorit të papnisë së Benediktit XVI. Në fillim të kremtimit, kryeipeshkvi
i Tiranë-Durrësit dhe kryetar i Konferencës ipeshkvnore katolike, imzot Rrok Mirdita,
theksoi besnikërinë e Kishës katolike të Shqipërisë ndaj Atit të Shenjtë, besnikëri
që nuk mungoi as gjatë persekutimit komunist. Në homelinë e rastit kardinali Groholevski
kujtoi sulmin e rreptë të regjimit komunist mbi zemrat e njerëzve, për të zhdukur
çdo gjurmë të fesë, të besimit, të Zotit, të lidhjes së pazgjidhshme me Atin e Shenjtë
dhe me mësimet e tij. Por nuk ia doli. E këtë e dëshmon më së miri ky kremtim,
në përkujtim të ngjarjes së madhe të para pesë vjetëve, kur në fronin e Shën Pjetrit
ulej Benedikti XVI, dhuratë e Hyjit për të gjithë. Kështu u shpreh kardinali dhe i
ftoi besimtarët ta sigurojnë përsëri Papën për bashkimin e plotë e të gëzueshëm me
Të. Gjatë Meshës u thanë lutje për Benediktin XVI dhe për suksesin e shtegtimit
të tij apostolik në Maltë. Edhe Kryeipeshkvia Metropolitane e Shkodrës e uroi Atin
e Shenjtë, si për 83-vjetorin e ditëlindjes, ashtu edhe për pesëvjetorin e papnisë.
Në katedralen e Shkodrës u mblodhën qindra besimtarë për t’i drejtuar Papës urimet
e për t’i shprehur edhe një herë besnikërinë, e cila nuk u mungoi as atëhere, kur
i panë bijtë e vet më të mirë duke vdekur me brohorinë: ‘Rroftë Krishti Mbret!’; ‘Rroftë
Papa!’ E urimi i përgjithshëm ishte: “Për shumë vjet!”.