Papa gazetarëve, në avion, gjatë fluturimit për në Maltë.
(14.04.2010 RV)Lidhur me fjalët e Papës drejtuar gazetarëve, Drejtori i Sallës
vatikanase të Shtypit, atë Federiko Lombardi, saktësoi: “Në këtë çast jemi para
shumë vështirësive e shumë mëkateve, ndërmjet të cilave, kriza e shpërdorimeve, e
për ta mendonte Papa, duke folur për mbytjen e për korpin e plagosur, por duke theksuar
edhe forcën shëruese, që vjen nga Ungjilli”.
Atë Lombardi: Të
dashur miq, ja pra, Shenjtëria e Tij është sërisht me ne, për të parin nga pesë shtegtimet
e këtij viti, që janë tashmë në program. Jemi shumë të kënaqur, që është me ne edhe
në fillim të këtij shtegtimi, sepse mund t’i bëjmë edhe urimet për dy përvjetore të
këtyre ditëve, për atë të djeshmin, të ditëlindjes, e për atë të së hënës së ardhshme.
Papa i mori pyetjet, që ia paraqitën disa nga ju e, prandaj, do të bëjë disa reflektime,
do të japë disa mendime, mbi bazën e pritjeve tona. Nuk do të ndjekim skemën e herëve
të tjera pyetje-përgjigje, pyetje-përgjigje. T’ia lemë Papës të na përgjigjet përmbledhtas.
Papa: Të
dashur miq, mirëmbrëma, të urojmë një udhtim të mbarë, pa këtë re të errët që dyndet
mbi një pjesë të Evropës. Atëherë, pse ky udhëtim në Maltë? Shkaqet janë
të shumta. I pari është Shën Pali. Përfundoi Viti kushtuar Apostullit në
Kishën universale, por Malta kremton 1950-vjetorin e mbytjes së anijes, me të cilën
lundronte; e ky për mua është një rast për të vënë në dukje figurën e madhe të Apostullit
të Popujve, mesazhin e tij të rëndësishëm, pikërisht edhe për sot. Mendoj se mund
ta sintetizoj thelbin e shtegtimit të tij, me fjalët që përdori ai vetë për këtë sintezë,
në fund të Letrës drejtuar Galatasve: feja, që vepron me dashuri! Këto kanë
rëndësi edhe sot: feja, marrëdhënia me Hyjin, që shndërrohet, pastaj, në dashuri.
Por mendoj se edhe mbytja e anijes na flet. Nga mbytja e anijes, Malta pati fatin
të ketë fenë; kështu mund të mendojmë edhe ne, se përmbytjet e jetës mund të përbëjnë
planin e Zotit për ne e mund të jenë edhe të nevojshme për fillesa të reja në jetën
tonë. Arsyeja e dytë: më pëlqen të jetoj në mes të një Kishe plot gjallëri,
si kjo e Maltës, e cila është plot me thirrje edhe sot, plot me fe, në një kohë si
jona; e gatshme për t’iu përgjigjur sfidave. E di se Malta e do Krishtin, se e do
edhe Kishën, që është Korpi i Tij; e di se ky Korp është plagosur nga mëkatet tona,
por edhe se Zoti e do këtë Kishë e Ungjilli i tij është forca e vërtetë, që pastron
e shëron. E treta: Malta është pika ku arrijnë rrymat e refugjatëve nga
Afrika, për të trokitur në portat e Evropës. Ky është problem i madh i kohës sonë,
e natyrisht nuk mund të zgjidhet nga ishulli i Maltës. Ne të gjithë duhet t’i përgjigjemi
kësaj sfide, të punojnë që të gjithë të munden, në tokën e tyre, të jetojnë një jetë
dinjitoze e, nga ana tjetër, të bëjmë të mundur që këta refugjatë të gjejnë, atje
ku arrijnë, një hapësirë jete dinjitoze. Përgjigje, që i jepet një sfide të madhe
të kohës sonë: Malta na kujton këto probleme e na kujton edhe se pikërisht feja është
forca që jep dashuri e, prej këndej, edhe fantazi, për t’iu përgjigjur mirë kësaj
sfide. Faleminderit!
Atë Lombardi: Ju falënderojmë, e udhtim
të mbarë atëherë! Do ta shoqërojmë edhe ne Papën me punën tonë e me informacionin
tonë.