(17.04.2010 RV)Malta, shtet i pavarur që nga viti 1964 e Republikë, që më 13
dhjetor 1974, është anëtare e Bashkimit Evropian nga 2 maji i vitit 2004. Dy partitë
kryesore (Nacionaliste e Laburiste) i zëvendësojnë njëra-tjetrën në pushtet. Dhoma
e Përfaqësive me 65 anëtarë të zgjedhur e me mandat për 5 vjet, zgjedh, me mazhorancë,
Presidentin e Republikës. Kryeministër është kryetari i partisë, që siguron mazhorancën
gjatë zgjedhjeve. Kufijtë dhe shtrirja gjeografike: Arkipelagu mesdhetar,
ndërmjet bregdetit sicilian e atij tunizian, përfshin ishullin e Maltës, të Gozos
(Ghawdex), të Kominos (Kemmuna) e disa të tjerë, më të vegjël. Territori është i përthyer,
me bregdet malor, të dhëmbëzuar. Malta është anëtare e Bankës Evropiane
për Rindërtimin, e Komonuelthit, e Këshillit të Evropës, e OKB-së, OSBE-së, BE-së,
e WTO-së (Organizatës Botërore të Tregtisë). Kryeqyteti është Valleta, me
7. 200 banorë. Qytete të tjera të rëndësishme: Mdina (450 banorë brenda
mureve të kryeqytetit të lashtë); Rabat, me 13 mijë banorë; Floriana, Senglea, Kospikua,
Vitorioza, Çitadela, Viktoria. Gjuhë zyrtare është ajo malteze, por përdoret
shumë edhe gjuha angleze. Sipërfaqja e arkipelagut është 315,6 kilometra
katrore. Popullsia: 443. 000 banorë (95,3% e popullsisë banon në qytete). Grupet
etnike: maltezë 93%, anglezë 2,1%, arabë 2%, italianë 1,5%, të tjerë 0,6%. Besimi
kryesor është ai katolik (94,4%); të tjerët përbëjnë 5,6% të popullsisë. Monedha:
që nga 1 janari i vitit 2009 Malta përdor euron. PBB (Prodhimi i Brendshëm Brut)/banorë:
15. 293 dollarë në vitin 2006.
Gjetjet më të lashta arkeologjike në trojet
e sotme të Maltës, janë tempujt megalitikë, ndërtuar rreth 3. 600 vjet para Krishtit.
Në vitet 800-480 para K. ishulli u kolonizua nga fenikasit, të cilët e quajtën “MLT”,
që do të thotë ‘strehim’, për shkak të portit natyror të Valetës. Në vitin 218 para
K u pushtua nga romakët. Këtu, në vitin 60 para K. u mbyt anija, me të cilën shtegtonte
Shën Pali, në përpjekjen për ta përhapur krishtërimin në të katër anët e botës së
asokohshme. Më pas Ishulli ra në dorë të bizantinëve (395-870), të arabëve (deri më
1090), normanëve (deri më 1194), svevëve gjermanikë (deri më 1266), anzhuinëve (deri
më 1283), kur Malta kaloi nën kurorën e Aragonës. Rregulltarët e parë të krishterë,
që u vendosën në ishull, ishin françeskanët. Më 1370 ata themeluan kuvendin e tyre
të parë, në Rabat. Më 1418 arritën edhe karmelitanët e kështu me radhë: më 1460 u
themelua kuvendi i parë augustinian; më 1530 perandori Karli V ia lëshoi arkipelagun
Kalorësve të Urdhërit të Shën Gjonit, të cilët u detyruan të largohen nga Rodi, pas
rrethimit nga Sulltan Sulejmani. Në vitin 1565 Malta u rrethua nga flota otomane:
nën drejtimin e Mjeshtrit të madh La Valetë, 540 kalorës e 4 mijë maltezë i bënë ballë
48 mijë ushtarëve e detarëve otomanë, derisa arritën përforcime nga Sicilia. Në vitin
1566 u hodhën themelet e Kryeqytetit, që mori emrin e “La Valetë”, për nder të Mjeshrit
të Madh të Urdhërit të Shën Gjonit, që e kishte shpëtuar nga rreziku otoman. Më
1588 këtu arritën kapuçinët, pas të cilëve, më 1592, jezuitët. Më 1798 Napoleon Bonaparti
pushtoi ishujt, duke dhunuar asnjanësinë e Urdhërit: kalorësit u larguan nga Malta
e u strehuan në Trieshtë. Me Traktatin e Parisit të vitit 1814, Malta kaloi nën
Kurorën britanike. Më 1903 u miratua Kongregata e Bijave të Zemrës së Krishtit
për edukimin e vajzave të varfëra. Më 1907 themelohet Shoqata e Doktrinës së Krishterë
nga ana e Gjergj Prekës (1880-1962), shpallur shenjt nga Benedikti XVI, më 3 qershor
2007, në Romë. Më 1942 Malta bombardohet rëndë nga aviacioni gjerman e ai italian;
dekorohet , më pas, me “George Cross” nga mbreti Gjergji VI. Malta u shpall e pavarur
nga Mbretëria e Bashkuar në vitin 1964. Më 1981-87 u krijua një atmosferë tensioni
ndërmjet qeverisë laburiste e Kishës katolike, lidhur me pronat kishtare dhe shërbimin
falas të shkollave katolike: Gjykata Kushtetuese i dha të drejtë Kishës. Më 1989 Selia
e Shenjtë dhe Malta nënshkruan Marrëveshjen për arsimin dhe edukatën katolike në shkollat
shtetërore.