Qeveria e Kosovës duhet të luftojë korrupsionin në nivele të larta
(14.4.2010 RV)Qeveria e Kosovës duhet t'i kthejë fjalët në vepra sa i përket
luftës kundër korrupsionit në nivele të larta, deklaroi Piter Feith. Adresimi i çështjeve
që kanë të bëjnë me korrupsionin, sipas Përfaqësuesit civil ndërkombëtar në Prishtinë,
nuk ka të bëjë vetëm me përmirësimin e imazhit të Kosovës jashtë, por dhe me pritjet
që ekzistojnë brenda vendit. "Populli në Kosovë e ndjen se janë marrë masa të pamjaftueshme
kundër korrupsionit, ndaj presin më shumë", tha Feith. Përfaqësuesi më i lartë
ndërkombëtar në Kosovë theksoi rëndësinë e vendimit të GJND së. "Mbijetesa e projektit
të pavarësisë tashmë po përballet me një provë kritike dhe Kosova shpreson që vendimi
do të jetë së paku i baraspeshuar, të ketë elemente pozitive në mënyrë që të arrihen
njohje të mëtejshme dhe qasje më e mirë në organizmat ndërkombëtare, çfarë do të mund
të ndihmojë zhvillimin socio ekonomik", tha Feith. Duke folur për shkallën e bashkëpunimit
mes Kosovës e Serbisë, Faith theksoi se "shumë nga ministrat e BE së janë disi të
shqetësuar, pasi nuk kemi parë atë lloj ecurie që do të donim. Ndoshta është ende
herët dhe duhet të presim për vendimin e Gjykatës, por është koha të fillojmë të mendojmë
për një të ardhme ndryshe", tha Feith. Deklaratat e Piter Feithit u bënë gjatë një
paraqitje në Institutin e Marrëdhënieve Ndërkombëtare dhe Evropiane në Dublin të Irlandës.