Presidenti i Shqipërisë Topi për vizitë në Maqedoni
(14.4.2010 RV)Me ftesë të presidentit të Maqedonisë, Gjorgje Ivanov, Presidentit
i Shqipërisë, Bamir Topi nis sot një vizitë treditore në vendin fqinj. Topi i cili
shoqërohet nga disa ministra, deputetë dhe përfaqësues të biznesit, takohet me drejtuesit
më të lartë të Maqedonisë, me përfaqësuesit e partive politike shqiptare, me drejtuesit
e komunave shqiptare si dhe me përfaqësuesit e universiteteve në gjuhën shqipe. Presidenti
i Shqipërisë, Bamir Topi dhe Presidenti i Maqedonisë, Gjorgje Ivanov, gjatë një takimi
të sotëm në Shkup, konfirmuan se "për të dy vendet integrimi në strukturat euroatlantike
është një alternativë e pazëvendësueshme për prosperitetin e mëtejshëm dhe stabilitetin
e rajonit". Presidenti shqiptar nisi sot vizitën e tij zyrtare në Republikën
e Maqedonisë, me ftesë të Presidentit maqedonas, Gjorgje Ivanov. Fillimisht, Kryetari
i Shtetit, së bashku me Zonjën e Parë, Teuta Topi, dhe delegacionin që e shoqëron,
u pritën me një ceremoni të posaçme zyrtare mirëseardhjeje nga Presidenti i Maqedonisë,
Ivanov, në Rezidencën Presidenciale në Shkup. Pas takimit kokë më kokë
dhe bisedimeve mes dy delegacioneve respektive, dy Presidentët konfirmuan për mediat
vullnetin për forcimin dhe thellimin e bashkëpunimit dypalësh. "Dy vendet
kanë nivel të kënaqshëm të marrëdhënieve bilaterale, të cilat i ndërtojnë nëpërmjet
dialogut të hapur për të gjitha çështjet e interesit të ndërsjelltë, ndërsa fokusi
në të ardhmen duhet të vihet në përmirësimin e bashkëpunimit ekonomik", vlerësuan
Presidentët e Maqedonisë dhe Shqipërisë, pas takimit të sotëm në Shkup. Presidenti
Ivanov theksoi se Maqedoninë dhe Shqipërinë i lidhin shumë gjëra, mes të cilave historia
e përbashkët, gjeografia, si dhe sfidat e përbashkëta në pjesën e reformave dhe transformimeve
shoqërore. "Segment i rëndësishëm në marrëdhëniet tona duhet të jetë bashkëpunimi
ekonomik për të cilin vlerësoj se aspak nuk korrespondon me nivelin e marrëdhënieve
politike, me mundësitë e të dy ekonomive dhe me faktin që jemi fqinj", theksoi Ivanov.
Ai u shpreh se në periudhën e ardhshme do të vazhdojë mbështetja e ndërsjelltë në
planin e BE-së dhe NATO-s të proceseve integruese, sepse, integrimi i të gjitha vendeve
të rajonit do ta përforcojë stabilitetin e tij. Duke folur për përfitimet nga
liberalizimi i vizave, të cilat qytetarët e Maqedonisë tashmë po i ndjejnë, Ivanov
shfaqi shpresë se së shpejti do të përfitojnë edhe qytetarët e Shqipërisë, gjë që
do të mundësojë përparimin e saj si shtet demokratik, i lirë dhe i hapur. Presidenti
shqiptar, Bamir Topi, theksoi se të gjithë duhet ta gëzojnë të drejtën e lëvizjes
së lirë dhe se qytetarët shqiptarë së shpejti do të fitojnë regjim pa viza.
Ai e përshëndeti zbatimin e Marrëveshjes Kornizë të Ohrit, e cila kontribuon për zhvillim
stabël të marrëdhënieve demokratike dhe për barazi të të gjithë qytetarëve të Republikës
së Maqedonisë. Topi u bëri thirrje të gjithë faktorëve politikë që të bashkangjiten
drejt zbatimit të Marrëveshjes së verifikuar nga komuniteti ndërkombëtar. Dy
presidentët në takim biseduan për çështje nga sfera e ekonomisë, për ndërtimin e Korridorit
8, hekurudhën dhe mbrojtjen e eko-zonës Ohër-Prespë. Gjatë vizitës zyrtare
në Shkup, Presidenti Topi do të takohet me autoritetet më të larta maqedonase dhe
do të mbajë një fjalim para deputetëve në Kuvendin e Maqedonisë Gjatë vizitës zyrtare
në Maqedoni, Kreu i Shtetit shqiptar Topi do të zhvillojë një sërë takimesh, si me
Kryeministrin maqedonas, Nikola Gruevski, me Kryetarin e Parlamentit, Trajko Veljanoski,
me Kryetarin e BDI së, Ali Ahmeti, me Kryetarin e PDSH së, Menduh Thaçi, me ish presidentin
Branko Cervenkovski, aktualisht Kryetar i Partisë opozitare LSDM, me Kryetarin e Partisë
Demokracia e Re, Imer Selmani, me Kryetarin e Komunës së Tetovës, Sadi Bexheti, me
Rektorin e Universitetit Shtetëror të Tetovës, Agron Reka, me Kryetarin e Komunës
së Dibrës, Argëtim Fida. etj.