Papa në audiencën e përgjithshme: Meshtarët të mos shpallin vetveten, por Krishtin
në këtë kohë konfuzioni të madh.
(14.04.2010 RV)Jetojmë në një konfuzion të madh, përsa i përket vendimeve themelore
për jetën. Filozofi, që kundërshtojnë njëra-tjetrën, lindin e zhduken e, nuk kujtojmë
më se nga vijmë, për çfarë jemi bërë, ku shkojmë”. Kështu tha Papa Benedikti XVI në
audiencën e sotme të përgjithshme, gjatë së cilës foli për emergjencën edukative dhe
për detyrat e meshtarëve në botën e sotme. Citoi një frazë domethënëse të Ungjillit:
“Ndjej dhembshuri për popullin, janë si delet pa bari”. “Të mësojë, të shenjtërojë,
të qeverisë, në thelb – shpjegoi Ati i Shenjtë – janë tre veprimet e Krishtit të Ringjallur,
i cili sot, përmes Kishës së vet, mëson, krijon fe, bashkon popullin e vet, e bën
të pranishme të vërtetën, krijon bashkim e shenjtëron”. Këtë e bën nga dhembshuria.
Edhe nëse kjo do të thotë të mbetesh i vetmi zë në shkretëtirë, Kisha duhet ta bëjë
të pranishme, në konfuzionin e çorientimin e ditëve të sotme, dritën, që është Fjala
e Zotit, që është vetë Krishti në botë. E pastaj, duke iu drejtuar drejtpërdrejt
meshtarëve, Papa i nxiti të mos shpallin vetveten e të mos kërkojnë suksesin. “Duke
ndjekur shembullin e Jezusit, që thoshte “doktrina ime nuk është e imja”, nënvizoi
Benedikti XVI, meshtari nuk interpeton ndonjë filozofi, nuk flet për të mbledhur admirues
rreth vetes, ose për të formuar ndonjë parti: mëson në emër të Krishtit të pranishëm,
propozon të vërtetën, që është Krishti vetë”. E meshtari vazhdoi Papa, nuk
është as zëdhënës i Teksteve të Shenjta, duhet t’i jetojë ai vetë së pari, në jetën
e përditshme. Detyra e parë e tij është t’u mësojë të tjerëve, një detyrë – tha Benedikti
XVI – që sot, në mergjencën e thellë edukative, është tepër e rëndësishme, nëse ushtrohet
konkretisht përmes shërbimit të çdo meshtari, i cili duhet të ketë guximin të thotë:
“Kjo doktrinë nuk është e imja, por jam goja e zemra e Krishtit”. Duke u folur
35 mijë besimtarëve të pranishëm në Sheshin e Shën Pjetrit, ku priteshin vetëm 16
mijë, Papa e la mënjanë tekstin e përgatitur për të folur lirshëm mbi këto argumente
të rëndësishme të fesë e të jetës së besimtarëve.