Hapet konferenca mbi sigurinë bërthamore në Uashington
(12.04.2010 RV)Të diskutohen masa konkrete për të përballuar kërcënimin e terrorizmit
bërthamor. Ky është objektivi i konferencës mbi sigurinë bërthamore, që zhvillohet
sot e nesër në Uashington, vetëm pak ditë pas nënshkrimit të Traktatit të ri START
ndërmjet SHBA-ve dhe Rusisë në Pragë. 47 janë vendet e ftuara nga presidenti amerikan
Barak Obama, plus delegatët e OKB-së, të Agjensisë Ndërkombëtare për Energjinë Atomike
dhe të Bashkimit Evropian. Nuk janë ftuar Irani dhe Koreja e Veriut. Në takimet para
fillimit të konferencës, kreu i Shtëpisë së Bardhë nënvizoi se mundësia që armët bërthamore
të përfundojnë në duart e organizatave terroriste si Al Kaida, përfaqëson “kërcënimin
më të madh kundër sigurisë së Shteteve të Bashkuara”.