Mesazh i Papës një vit pas tërmetit në Akuila të Italisë
(06.04.2010 RV)Një vit pas tërmetit në Akuila të Italisë, Papa Benedikti XVI
i shprehu Kishës së vendit dhe bashkësisë civile afërsinë e tij shpirtërore dhe i
inkurajoi ta bazojnë rindërtimin, jo vetëm të shtëpive, por edhe të shpirtit e të
shoqërisë, në fenë e Krishtit të Ringjallur. Mesazhi i Atit të Shenjtë u lexua gjatë
Meshës së kremtuar natën e djeshme në bazilikën e Kolemaxhos dhe i drejtohet kryeipeshkvit
të Akuilës, imzot Xhuzepe Molinari. Në tekst, Papa Racinger i nxit abrucezët
ta mbrojnë trashëgiminë e tyre shekullore fetare e morale, duke u siguruar lutjen
e tij për ta e duke u dhënë të gjithëve bekimin apostolik. Në meshën e natës së djeshme,
25 mijë vetë kujtuan tërmetin e fuqishëm të 6 prillit të kaluar, i cili shkatërroi
një pjesë të mirë të qytetit të Akuilës dhe shkaktoi 308 të vdekur, të personifikuar
dje me 308 tingëllime të këmbanës së kishës.