Presidenti Topi dekoron imzot Mirditën e 3 udhëheqës tjerë të bashkësive fetare në
vend me Urdhrin "Gjergj Kastrioti Skënderbeu".
Presidenti i Shqipërisë Bamir Topi dekoroi sot, me Urdhrin "Gjergj Kastrioti Skënderbeu",
katër udhëheqësit më të lartë shpirtërorë të bashkësive fetare në vend, ndër ta imzot
Rrok Mirditën, kryeipeshkëv i Tiranë-Durrësit e president iKonferencës Ipeshkvnore
Katolike të Shqipërisë. Në një ceremoni zyrtare të zhvilluar në Pallatin
e Brigadave, Presidenti Topi dekoroi Kryetarin e Bashkësisë Myslimane të Shqipërisë,
Haxhi Selim Muça, Kryepeshkopin e Tiranës, Durrësit dhe të gjithë Shqipërisë, Fortlumturinë
e tij, Anastas Janullatos, Arqipeshkvin Metropolit të Tiranë- Durrësit dhe Kryetarin
e Konferencës Ipeshkvnore Katolike të Shqipërisë, Imzot Rrok Mirditën, dhe Kryegjyshin
Botëror të Bektashinjve, Haxhi Dede Reshat Bardhin. Katër klerikët u dekoruan
nga Kreu i Shtetit me motivacionin: "Për kontributin dhe veprimtarinë e vyer në ringjalljen
e besimit shpirtëror dhe shpresës për një të ardhme më të mirë, për ringritjen e institucioneve
të kultit si dhe për forcimin e pasurimin e mëtejshëm të harmonisë, tolerancës dhe
bashkëjetesës ndërfetare të popullit shqiptar". Në fjalën e tij, Presidenti
Topi veçoi bashkëjetesën fetare, si një vlerë të veçantë të popullit shqiptar. "Kjo
bashkëjetesë është atribut i bashkësive fetare përfaqësuese, që predikojnë me urtësi
dhe përkushtim besimin e tyre, por është edhe bashkëjetesa e qytetarëve shqiptarë",
tha Presidenti Topi. Kreu i shtetit theksoi se "bashkësitë fetare kanë punuar
gjithmonë në favor të kësaj vlere dhe gjatë krizave dhe traumave shoqërore në etapa
të ndryshme të tranzicionit, përfaqësuesit e këtyre bashkësive janë shndërruar në
kolona të paqes sociale". "Diktatura synoi me çdo mjet ta shkëpuste shqiptarin
nga besimi e Zoti, duke persekutuar klerin dhe mbyllur objektet e kultit, fakt ky
që në vitin 1967 pati kulmin e vet tragjik. Në vitin 1990-të, me rrëzimin e komunizmit
do të dukeshin edhe e pasojat e këtij ndryshimi në jetën e bashkësive fetare", tha
Presidenti Topi. Kreu i Shtetit shprehu besimin se "bashkësitë fetare në
vend, ashtu siç kanë bërë deri tani nën frymën e traditës dhe të kujdesit për një
shoqëri të lirë e demokratike, do t'i izolojnë zërat ekstremistë dhe fondamentalistë
në gjirin e tyre", pasi sipas tij, "shfaqja e tyre pikësëpari nuk tolerohet nga vetë
besimtarët". Përdorimi i fesë për qëllime politike është i papranueshëm,
tha më tej Presidenti Topi, duke shtuar se "futja e argumentit fetar si prapavijë
politike është rrezik për harmoninë dhe laicitetin e shtetit". "Fetë e mëdha
disponojnë shumë objekte kulti, të cilat nuk janë vetëm trashëgimi shpirtërore, por
edhe kulturore. Ato nuk mund të shihen thjesht si prona të bashkësive, por si pasuri
kombëtare, të cilën shteti duhet ta mbrojë, duke e restauruar e promovuar në disa
këndvështrime, si emblema të identitetit dhe qytetërimit shqiptar", tha më tej Kreu
i Shtetit. Ai siguroi se "do të ushtroj gjithë autoritetin për të ndikuar
në përmirësimin e kujdesit në nivel institucional për këto çështje". Ndërsa,
katër udhëheqësit më të lartë shpirtërorë të bashkësisë fetare shqiptare i shprehën
Kryetarit të shtetit falenderimin dhe mirënjohjen e tyre të veçantë për vlerësimin
që u bëri. Në këtë ceremoni ishin të pranishëm edhe personalitetet më të
larta të institucioneve të pavarura dhe të Trupit Diplomatik të akredituar në vendin
tonë, si dhe Nunci Apostolik në Tiranë. Më hollësisht të ndjekim informacionin
nga don Gjergj Meta…..