(29.03.2010 RV)Rusia e shokuar për atentatin e dyfishtë, që goditi sot në mëngjes
dy stacione të metropolitanës së Moskës, jashtëzakonisht të frekuentuara. Rreth dyzet
– të vdekurit, ndërsa dhjetra të plagosur janë transportuar nëpër spitalet e kryeqytetit.
Të dyja shpërthimet janë vepër e dy grave kamikaze, që sipas policisë, kanë
të bëjnë me terrorizmin islamik në Kaukazin Verior. Ato mbanin rreth 3 kg tritol secila,
që u ndez në stacionin e Lubiankës dhe të Park Kulturi. Një sasi tjetër është gjetur
e pashpërthyer në stacionin Park Kulturi. Presidenti Medvedjev, duke i folur kombit,
theksoi se Rusia do të vazhdojë ta luftojë terrorizmin, deri në zhdukjen e tij. Më
i ashpër, komenti i kryeministrit Putin, i cili premtoi se përgjegjësit e kësaj masakre
do të gjenden dhe asgjësohen. I njëzëshëm, dënimi i bashkësisë ndërkombëtare.
Kryeipeshkvi katolik i Moskës, duke shprehur ngushëllimet e veta për viktimat, tha
se nesër e pasnesër, besimtarët e Moskës e të Shën Pietërburgut do të luten për të
mirën e popullit rus e të kryeqytetit. Në fakt, shpërthimet ndodhën pikërisht në çastin
kur po kremtohej Mesha në dy kisha të zonës. Ndërkaq, Patriku ortodoks Kirill e ftoi
popullsinë të mos krijojë panik. Të dëgjojmë analizën e korrespondentit të gazetës
italiane “Corriere della Sera” në Moskë, Fabricio Dragozei: Sigurisht,
është një goditje në zemrën e pushtetit rus. Vendet e zgjedhura për këto atentate
nuk janë të rastit. Njëri prej stacioneve, ai i Lubiankës, që është më i famshmi,
ndodhet afër zyrave të nëndheshme të ish-KGB.së, sot FSB, shërbime sekrete që janë
marrë me luftën kundër terrorizmit çeçen. Prandaj, sinjali është mëse i qartë. Mund
të jetë edhe hakmarrja për vrasjen e njërit prej krerëve të guerriljes, gjatë ditëve
të kaluara në Ingushecia. Autoritetet moskovite deklaruan edhe sot se do
ta vazhdojnë luftën kundër terrorizmit, ashtu si më parë… Sinjali që dëshiron
të japë Kremlini është lufta pa kompromis. Kjo gjë na shqetëson për shkak të ndikimit
që mund të ketë në respektimin e të drejtave të njeriut në zonat e Kaukazit, ku në
të kaluarën, kjo luftë është bërë me sisteme të papranueshme për një vend demokratik,
siç dëshiron të jetë Rusia. Metropolitana e Moskës transporton çdo ditë,
mbi 9 milion vetë: një objektiv i ndjeshëm, por edhe i lehtë… Po, sepse
metropolitana është jashtëzakonisht e madhe: në Moskë kemi 300 km, me stacione të
shumta dhe të frekuentuara, edhe nga persona që vijnë nga jugu për të shitur prodhimet
e tyre në Moskë, prandaj hyjnë në metropolitanë me çanta të stërmëdha, me xhepa, ku
kanë mallra të çdo lloji. Nëse eksplozivi ishte vetëm 3 kg tritol, do të thotë se
nuk nevojiteshin aspak çanta të mëdha, mjaftonte një çantë e vogël shpine. Atentatorë
të tillë janë tepër të vështirë për t’u gjetur në një metropolitanë, që transporton
kaq shumë njerëz..