Սրբազան Քահանայապետին հանդիսաւոր պատարգը Ծաղկազարդի տօնին առթիւ։ Եւ ծիսական շաբաթը։

Սրբազան Քահանայապետին հանդիսաւոր պատարգը Ծաղկազարդի տօնին առթիւ։ Եւ ծիսական շաբաթը։



Ծաղկազարդի պատարգը սկսաւ առաւօտեան ժամը 9.25ին ս. Պետրոսի հրապարակի վրայ։ Հրապարակը խռնուած էր հաւատացեալներով եւ ուխտաւորներով եւ զարդարուած արմաւենիի եւ ձիթենիի ոստերով։

Նորին Սրբութիւնը իր արտասանած քարոզին մէջ բացայայտեց օրուան տօնին խորհուրդը ըսելով.Այսօր եկեղեցին կը տօնէ Ծաղկազարդը։ Այս տօնակատարութեան ընթացաքին կ՛օրհնուին ձիթենիի ճիւղերը եւ կը բաժնուին ժողովուրդին, որպէսզի ամէնքը մասնակցին Քրիստոսի յաղթական մուտքին Երուսաղէմ։ Հրեաները Յիսուսը ողջունեցին հետեւեալ խօսքերով. Օրհնեալ է ան որ կու գայ Տիրոջ անունով։ Մենք եւս ողջունենք Քրիստոսի գալուստը մեր մէջ։ Անոր ներկայութիւնը մեր մէջ առիթ է ուրախութեան եւ յոյսի։ Աղօթենք Տիրոջ որպէսզի մեզի պարգեւէ Երկինքի Արքայութիւնը. Աստուծոյ փառքը եւ խաղաղութիւն մարդոց միջեւ։ Մեր այս ողջոյնը ըլլայ Տէրունական աղօթքի հոգիով. ''Եղիցի կամք քո որպէս յերկինս եւ յերկրի''։

Մենք, ըսաւ Սրբազան Քահանայապետը,գիտենք թէ երկինքը վայրն է Աստուծոյ փառքի ու խաղաղութեան, որովհետեւ հոն կը գերիշխէ Աստուծոյ կամքը։ Եւ գիտենք թէ երկիրը երկինք չէ, որքան որ Աստուծոյ կամքը չի կատարուիր։ Հետեւաբար ըսաւ Նորին Սրբութիւնը իր խորհրդածութիւնը եզրափակելով ողջունենք Յիսուսը որ երկինքէն կու գայ եւ աղօթենք Անոր որպէսզի օգնէ մեզի ճամչնալու եւ կատարելու Աստուծոյ կամքը։ Թող Աստուծոյ Արքայութիւնը աշխարհ մտնէ որպէսզի խաղաղութիւնը տիրէ մեր մէջ։



Ծիսական ժամանակացոյց ԱՒԱԳ ՇԱԲԱԹ 28 մարտէն - 3 Ապրիլ 2009

Աւագ Շաբաթը բոլոր ծէսերուն մէջ յատուկ տեղ մը կը գրաւէ. Կոչուած նաեւ Սուրբ Շաբաթ, ան կը բովանդակէ իր մէջ այն 8 օրերը որոնք ամէնէն բովանադակալից օրերն են Քրիստոսի կեանքին եւ վարդապետութեան։ Յիսուս Երուսաղէմ կը մտնէ փառաւոր կերպով, գիտնալով հանդերձ որ հոն զինք պիտի սպաննեն Հրէաները, սակայն հարկադրաբար ինք կու գայ, նման անմեղ գառնուկին` իր դահիճին առջեւ, որովհետեւ այդպէս միայն պիտի կարենայ իր կատարումին հասցնել իր անձին զոհը մարդոց փրկութեան համար։ Ծաղկազարդի Ովսաննաներուն պիտի յաջորդեն միեւնոյն ժողովուրդի ի խաչ հան աղաղակները։ Սակայն այդպէս է որ պիտի իրագործուի Հօր կամքը, եւ ինք աշխարհ եկած է կատարելու իր երկնաւոր Հօր կամքը։

Կիրակի` 28 մարտին, կը տօնենք Ծաղկազարդը։ Այս տօնակատարութեան ընթացաքին կ՛օրհնուին ձիթենիի ճիւղերը եւ կը բաժնուին ժողովուրդին, որպէսզի ամէնքը մասնակցին Քրիստոսի յաղթական մուտքին Երուսաղէմ։ Իսկ հայ ծէսը ունի շատ գեղեցիկ արարողութիւն մը այս օրուան համար, Դռնբացէքի արարողութիւնը. Աւագերէցը ժողովուրդին հետ կ՛երթայ Եկեղեցւոյ դռնէն դուրս եւ երեք անգամ կը բախէ դուռը խնդրելով աղերսագին որ Տէրը բանայ իրեն եւ իր ժողովուրդին համար` ողորմութեան դռները։ Նման 5 իմաստուն կոյսերուն` բոլոր ժողովուրդը վառած մոմեր կը բռնէ եւ կը սպասէ եկեղեցւոյ դռներու բացուելուն, որպէսզի ներս մտնէ երգով ու աղօթքով։ Նախապէս կը կատարուի նաեւ անդաստանի գեղեցիկ արարողութիւնը, դարձեալ զուտ հայկական, ուր կ՛օրհնուին աշխարհի չորս կողմերը։

Ծաղկազարդի տօնը Ամենայն Հայոց Գարեգին Բ Կաթողիկոսը հռչակած է որպէս մանուկներու օրհնութեան օր: Բոլոր եկեղեցիներու մէջ այդ առիթով կատարելու է մանուկներու օրհնութեան յատուկ արարողություն:
Աւագ Երկուշաբթի, 29ին` Հայ Եկեղեցին կը տօնէ Որոտման որդիներու տօնը. Անոնց մայրը` կը խնդրէ Յիսուսէն որ իր երկու որդիները, որոնք Յիսուսի առաքեալներն են, նստին Յիսուսի աջ եւ ձախ կողմը երկնքի արքայութեան մէջ։

Աւագ Երեքշաբթի, 30 մարտին` 10 կոյսերու առակին աւետարանն է. հինգը իմաստուն են, որովհետեւ աւելորդ ձէթ պատրաստած են իրենց լապտերներուն համար, փեսայի սպասման ժամանակ. Իսկ միւս հինգը յիմար են, որովհետեւ ձէթի պաշար մը չեն առած իրենց հետ եւ երբ կէս գիշերին փեսան կը հասնի, իրենց լապտերները արդէն մարած ըլլալով` չեն կրնար մտնել հարսանիքի տօնին։

Աւագ Չորեքշաբթի 31 մարտին` երկու դէպք կը պատմուի Սուրբ Աւետարանին մէջ. Մին Բեթանիայի օծումն է, ուր մեղաւոր կին մը կու գայ օծելու անուշահոտ իւղով մը Յիսուսի ոտքերը. Ասիկա գայթակղութիւն կը պատճառէ նոյնիսկ կարգ մը առաքեալներուն, գլխաւորապէս Յուդայի, թանկագին իւղի վատնումին պատճառաւ։ Միւս դէպքը Յուդայի որոշումն է մատնելու իր Տէրը։

Աւագ Հինգշաբթի մէկ ապրիլին, Վերջին ընթրիքի պահուն, զոր Քրիստոս կ՛անցնէ իր առաքեալներուն հետ, կը լուայ անոնց ոտքերը եւ ապա կը հաստատէ Սուրբ Հաղորդութեան խորհուրդը, բաժնելով անոնց հացը եւ գինին, որոնք կը խորհրդանշեն իր մարմինն ու արիւնը։

Աւագ Ուրբաթ 2 ապրիլին` կը յիշենք Յիսուսի չարչարանքները եւ մահը խաչի վրայ. Այդ օրը Սուրբ պատարագ չի մատուցուիր, առ ի յարգանս Քրիստոսի թաղման։ Յուզիչ է սոյն արարողութիւնը հայկական ծէսին մէջ, ուրուն կը յաջորդէ Քրիստոսի թաղման թափօրը արեւելեան երկիրներու մէջ։

Աւագ Շաբաթ 3 Ապրիլին կը սկսի Ճրագալոյցը Սուրբ Յարութեան. Երեկոյեան դէմ` կը կատարուի ընթերցում Քրիստոսի յարութեան հայող մարգարէութիւններու եւ ապա` հանդիսաւոր Սուրբ Պատարագ։

Յայտնենք, որ Սիլվա Նազարեան 6 տարիէ ի վեր այս մարզին մէջ աշխատանք կը տանի եւ իր խանութին մէջ կը ցուցադրէ իր շինած ձեռային աշխատանքներն ու զարդեղէնները, ինչպէս նաեւ կողովները, զորս կը պատրաստէ զանազան առիթներու համար։