Papa ipeshkvijve skandinavë: mbroni jetën dhe vlerën e familjes së bazuar mbi martesën
(25.03.2010 RV)Mbrojtja e jetës dhe e familjes së bazuar mbi martesën, si edhe
rëndësia e fesë për të mirën e përbashkët ishin sot në qendër të fjalimit që mbajti
Papa Benedikti XVI para ipeshkvijve skandinavë, në vizitë “ad Limina” në Vatikan.
Ati i Shenjtë i priti paradite në audiencë. Gjatë viteve të fundit, tha Papa,
vërejmë dobësimin e institucionit të martesës dhe të vizionit të krishterë mbi seksualitetin,
por fëmijët kanë të drejtë të rriten brenda kontekstit familjar: “It is
through the secure and recognized relationship…” Fëmijët mund ta zbulojnë
identitetin e tyre vetëm përmes marrëdhënieve të sigurta e të njohura ndërmjet prindërve.
Në një shoqëri me traditë në mbrotjen e të drejtave të njeriut, do të prisnim që t’i
jepet përparësi kësaj së drejte të fëmijëve, nënvizoi Benedikti XVI, duke kritikuar
ashpër të ashtuquajturën “të drejtë abortimi”. E pastaj, duke iu drejtuar veçanërisht
ipeshkvijve, Ati i Shenjtë theksoi: “Within your flock, pastoral care of
families…” Në grigjën tuaj, kujdesi baritor për familjet e për nevojat
e të rinjve duhet të vazhdojë me hov të ri, sidomos për ata që vuajnë efektet e krizës
ekonomike. Duhet treguar gjithashtu kujdes, vërejti Papa, duke pasur parasysh konktestin
multietnik e multikulturor te vendeve skandinave, për ato martesa ku vetëm njëri nga
bashkëshortët është katolik. Më pas, Benedikti XVI vuri theksin mbi rolin e fesë
në formimin e opinionit publik dhe në vendimet për të mirën e përbashkët. Në veçanti,
Papa përmendi themelimin e “Institutit Njuman” në Upsala, i cili siguron kontributin
e mësimeve të krishtera në botën akademike skandinave. E duke kujtuar Vitin Meshtarak,
një mendim i veçantë për priftërinjtë: “In this Year for Priests, I ask you
to give…” Në këtë Vit Meshtarak, jepini përparësi inkurajimit dhe mbështetjes
së meshtarëve, që shpesh duhet të punojnë të izoluar nga njëri-tjetri dhe në rrethana
të vështira për të çuar Sakramentet pranë popullit të Zotit. Me të vërtetë, bashkësia
katolike skandinave është e vogël dhe e shpërndarë në një zonë mjaft të gjerë. Është
përgjegjësia juaj – u tha Papa ipeshkvijve – të verifikoni përgatitjen e meshtarëve
dhe aftësinë për të kryer shërbimin e tyre të shenjtë. Në fund, Benedikti XVI foli
për emigrantët, sidomos për ata që vijnë nga Lindja e Mesme e bëjnë pjesë në Kishën
Skandinave. Duhet të ndihmohen për t’u integruar në shoqëri, këshilloi Ati i Shenjtë.