Sot Kisha katolike përkujtoi Shën Katerinën e Suedisë.
(24.03.2010 RV)Shën Katerina është e dyta, ndërmjet tetë fëmijëve që i fali
Zoti mistikes së njohur, Shën Brigjidës të Suedisë, bashkëpajtore e Evropës. Lindi
më 1331. U njoh me emrin Katerina Ulfsdoter, që do të thotë e bija e Ulfit, sepse
i ati quhetj Ulf Gudmarson. U rrit pranë një nëne që ndikoi fuqimisht mbi jetën, historinë
dhe letërsinë e vendit të vet. Por jeta e dy shenjtoreve, nënë e bijë, u lidh më
shumë me Romën. Katerina u martua fare e re me Edgar fon Kiren, fisnik nga familja
edhe më fisnik nga shpirti, i cili jo vetëm e lejoi të ruante virtytin e krishterë
të pastërtisë, por bëri edhe ai vetë të njëjtin kusht. Kur Shën Katerina arriti në
Romë, ku ndodhej e ëma, për të kremtuar me të Vitin Shenjt, mori vesh se bashkëshorti
kishte vdekur. Që nga ky çast, nënë e bijë ecën në të njëjtën rrugë shenjtërie.
Pas vdekjes së Nënës, Katerina hyri në kuvendin e Vadsenës, ku u zgjodh abateshë.
U rikthye në Romë për lumnimin e Shën Brigjidës më 1391. Simbas traditës, me ndërmjetësinë
e saj Roma shpëtoi nga një përmbytje e tmerrshme, që i kërcënohej. Ndërroi jetë më
24 mars 1381. Nuk është shpallur shenjte nga Kisha, por në vendin e saj njihet si
e tillë. Kremtohet pikërisht ditën e mbërritjes në qiell, më 24 mars.