Kuarteti i Lindjes së Mesme: ndal kolonive izraelite e paqe brenda 2 vjetësh
(19.03.2010 RV)Të ndalen ngulimet hebraike në Çisjordani e të arrihet paqja
ndërmjet izraelitëve e palestinezëve brenda dy vjetësh. Kuarteti për Lindjen e Mesme
përcakton kështu harkun kohor të bisedimeve, të cilit i përgjigjet me entuziazëm Ramallahu,
por jo edhe ministri i jashtëm izraelit, Avigdor Liberman. Ishte Sekretari i Përgjithshëm
i OKB-së, Ban Ki-Mun ai që lexoi sot deklaratën e Kuartetit, i cili del sërish në
dritë pas diskutimeve të shumta politike e diplomatike. SHBA-të, Rusia, OKB-ja
e Bashkimi Evropian kërkojnë që qeveria e Tel Avivit të ndalë urgjentisht ndërtimin
e shtëpive në të gjitha ngulimet hebraike, edhe ato ndërtime që konsiderohen nga kryeministri
Netanijahu si rritje natyrore. Gjithashtu, Izraeli duhet të tërhiqet nga pozicionet
e zëna në mars 2001 dhe të bëjë hapa mbrapa në vendimet për shkatërrimin e shtëpive
e largimin e palestinezëve nga Jeruzalemi. Dy vjet: kjo është koha brenda së cilës
duhet t’i jepet fund pushtimit izraelit të filluar në vitin 1967 dhe të krijohet një
shtet palestinez i pavaruar e demokratik, përkrah Izraelit.