Patriku Tval të krishterëve: mbillni paqe e shpresë në Tokën Shenjte
(18.03.2010 RV)Çdo pushtim bën që të lindin ndjenja urrejtjeje. Pushtuesi humb
ndjenjën e respektit për dinjitetin e tjetrit, ndërsa tek i pushtuari rritet ndjenja
e refuzimit, e mllefit dhe e kundërshtimit. Me këto fjalë, Patriku latin i Jeruzalemit,
imzot Fuad Tval komentoi përleshjet e fundit në Tokën Shenjte, në një seminar në katedralen
e Gjenovës në Itali, ku u fol mbi gjendjen e Kishës në vendet e Jezusit, pas vizitës
së Benediktit XVI. Toka e Shenjtë – tha Patriku – ka nevojë për fara shprese e paqeje
që të bëjë hapa konkrete drejt pajtimit. Por ka njerëz, që ndjekin objektiva krejtësisht
të kundërta, pa asnjë ndjenjë përgjegjësie. Të krishterëve të Izraelit, shumica e
të cilëve janë arabë si nga gjuha, ashtu edhe nga kultura, u kërkohet të jenë ura
ndërmjet feve, qytetërimeve, kulturave e politikave. Ndërsa në Palestinë, shpjegoi
imzot Tval, katolikët arabë duhet t’u japin përgjigje atyre që e shohin krishterimin
si të paimpenjuar politikisht, sikur të krishterët që punojnë në drejtësi, në dialog
për arritjen e paqes nuk mbajnë qëndrim kundër pushtuesve. Teologjia dhe baritoria
e faljes, karakteristikë e krishterimit, interpretohen si mosimpenjim. Të krishterët
palestinezë vuajnë nga gjendja e krijuar në vend e sidomos nga papunësia, prandaj
gjithnjë e më tepër largohen si emigrantë për në vende të tjera, përfundoi me keqardhje
Patriku latin i Jeruzalemit.