Kriza greke. Bashkimi evropian nuk i jep dot zgjidhje.
(18.03.2010 RV)Bashkimi Evropian
nuk është i një mendjeje në lidhje me ndihmat që i duhen dhënë Greqisë për të kapërcyer
krizën e thellë financiare që e ka mbërthyer. Kështu, nga njëra anë Kancelarja Angela
Merkel, dje përpara parlamentit gjerman, kërkoi përjashtimin nga zona euro të vendeve
që nuk i respektojnë detyrimet e bilancit. Ndërsa nga ana tjetër, kryetari i Bankës
Qendrore Evropiane Zhan Klod Trishé e konsideroi propozimin e Gjermanisë si absurd.
Po, a ka rrezik që këto qëndrime kaq të kundërta në lidhje me Greqinë ta dobësojnë
politikën ekonomike evropiane? Në mikrofonin tonë flet profesori i ekonomisë politike
pranë Universitetit Katolik të Milanos, Alberto Kuadrio Kurcio:
Përgjigje:
Sipas meje, Trishé ka të drejtë. Kurse Merkel, edhe herë të tjera, ka bërë deklarata
në Parlamentin gjerman që i drejtohen thjeshtë deputetëve dhe opinionit publik gjerman
dhe s'kane lidhje me perspektivat evropiane dhe Evropën, për të cilën Gjermania ka
punuar me mish e shpirt e që të gjithë ne duhet t’i vlerësojmë. Po përmendi këtu sa
kanë bërë Adenauer dhe Kol. Uroj që deklarata e Merkelit të ketë qenë diktuar vetëm
nga rrethanat e brendshme.
Pyetje: Sikur propozimi i Merkelit të fitonte,
çfarë lloj pasojash do të kishim në nivel global evropian?
Përgjigje: Sikur
Greqia të dilte nga euroja atëherë do të vihej në punë një mekanizëm operacionesh
spekullative ndaj vendeve të tjera, ndaj obligacioneve e aksioneve të tyre, me pasoja
të paparashikueshme. Po u tregove i pafuqishëm tani do të thotë të vësh në rrezik
të gjithë Evropën, ose më mirë zonën euro, duke e çuar drejt një shpërbërjeje të ngadaltë.