Kardinal Bertone me krerët e Konfindustries italiane: vetëm kur respektohet njeriu
krijohet mirëqënie dhe zhvillim i qëndrueshëm
(16.03.2010 RV)Strategjitë dhe taktikat për të hyrë në lojën e konkurencës
e të tregut nuk mund të përjashtojnë punëtorët e familjet nga mirëqënia, të cilën
e krijojnë ata vetë. Kështu foli sot para Konfindustries italiane, sekretari i Shtetit
të Vatikanit, kardinali Tarçizio Bertone. Prelati u nis nga enciklika e fundit
e Papës Benedikti XVI “Caritas in Veritate”, duke uruar krijimin e një brezi të ri
politikanësh, ekonomistësh dhe afaristësh të krishterë, të aftë të nxisin një zhvillim
të qëndrueshëm. Jo “sa vlen” por “çfarë vlen”, kujtoi kardinali moton e inxhinjerit
të njohur Adriano Oliveti, themelues i firmës që mbante emrin e tij e që diti të shndërrojë
rezultatet e punës prodhuese në përparim civil. Kardinal Bertone kujtoi se
kriza aktuale u shkaktua nga po ai defiçit i vlerave morale, që vazhdon të ekzistojë
edhe gjatë përpjekjeve për të dalë nga kriza. Siç shkruan Benedikti XVI në enciklikë,
ekonomia nuk mund të ketë autonomi morale dhe ndërmarrja apo firma mbetet gjithnjë
një mjet dhe jo qëllim në vetvete, duke përfshirë këtu edhe fitimin. Është kuptimi
që i jep këtij fitimi afaristi, ai që e kthen në zhvillim të përgjithshëm.